Túrkistan oblysynda mediatsiia jumysy qarqyndy damýda
Seminar keńeste Túrkistan oblystyq sotynyń azamattyq ister jónindegi sot alqasynyń tóraǵasy Túgel Bekimbetov, «Túrkistan oblysynyń kásipodaqtar ortalyǵy» aýmaqtyq kásipodaqtar birlestiginiń bas mamany Ádiljan Datqaev, Túrkistan oblystyq sotynyń sýdiasy Baýyrjan Táńirberdiev baiandama jasady.
Jaryssózde «Túrkistan oblysynyń kásipodaqtar ortalyǵy» aýmaqtyq kásipodaqtar birlestigi tóraǵasynyń mindetin atqarýshy Serik Áýeshanov kásipodaqtar birlestigi janynan ashylǵan «Tatýlasý ortalyǵynyń» jumys tájiribelerimen bólisti. Atalǵan ortalyqta 7 kásibi mediator kezekshilikpen jumys atqaryp keledi. Búginge deiin ortalyqqa 27 azamat kelse, onyń 10-y bitimgershilikpen, mediatsiialyq protsespen sátti aiaqtalyp, 17-ne túsinikteme, keńester berilgen. Sonymen birge, kásipodaqtar uiymdarymen 154 eńbek daýlary qaralyp, sheshilgenin aitty.
Seminar-keńes kezinde aýdandardan, onyń ishinde aýyl okrýgterinen kelgen qoǵamdyq negizdegi nemese kásibi emes mediatorlar men kásibi mediatorlar tarapynan jumysty jaqsartý baǵytyndaǵy jáne zańǵa ózgerister men tolyqtyrýlar engizý týraly qundy usynystaryn berdi.
Sondai-aq, mediatsiia institýtynyń jaǵdaiy men damý máseleleri sóz bolyp, Qazaqstan halqy Assambleiasy mediatsiia qurylymynyń memlekettik organdar men azamattyq qoǵam institýtymen ózara is-qimylynyń negizgi tetikteri men qoǵamdyq mediatorlar men bilerdiń jumysyn jandandyrý máseleleri talqylandy. Qatysýshylar tarapynan turaqty túrde óńirdiń barlyq aýdandarynda túsindirý jumystaryn keńinen júrgizip, buqaralyq aqparat quraldarynda aqparat berilip, ashyq esik kúnderin ótkizý, el azamattaryna arnalǵan mediatsiia boiynsha seminar-treningterdi jii ótkizý, siiaqty birqatar usynystar aityldy.
Seminar sońynda Túrkistan oblystyq sotynyń azamattyq ister jónindegi sot alqasynyń tóraǵasy Túgel Bekimbetov, Túrkistan oblystyq Qazaqstan halqy assambleiasy hatshysynyń mindetin atqarýshy Madina Kamedenova jáne «Túrkistan oblysynyń kásipodaqtar ortalyǵy» aýmaqtyq kásipodaqtar birlestigi tóraǵasynyń mindetin atqarýshy Serik Elemesuly Áýeshanov mediatsiia jumystaryn birlese júrgizý boiynsha ózara tiimdi yntymaqtastyq memorandýmyna qol qoidy.
Dalanews.kz
