Túrkistan oblysynda maining qurylǵylaryn jymqyrý isi boiynsha birneshe adamǵa qatysty úkim shyqty. Bul týraly Túrkistan oblystyq sottarynyń baspasóz qyzmeti málimdedi, dep habarlaidy Dalanews.kz.
Oblystyń qylmystyq ister jónindegi mamandandyrylǵan aýdanaralyq sotynda is alqabilerdiń qatysýymen qaralǵan.
Sot úkimine sáikes, N. men A.-nyń áreketi qaita saralanyp, olar Qylmystyq kodekstiń 361-baby («Qyzmettik ókilettikterin asyra paidalaný») boiynsha kináli dep tanyldy. Ekeýi de úsh jylǵa bas bostandyǵynan aiyrylyp, ómir boiyna memlekettik qyzmette laýazym atqarý quqyǵynan aiyryldy. Sonymen qatar N. politsiia maiory, al A. podpolkovnik arnaiy ataqtarynan aiyryldy.
Sot materialdaryna sáikes, 2024 jyldyń qarashasynda buryn esirtkige qatysty isterge tartylǵan B. esimdi azamat politseilerge «L.» JShS kóliginde esirtki bolýy múmkin ekenin habarlaǵan. Alaida N. men A. bul aqparatty tirkemei, basshylyqqa jetkizbegen. Kerisinshe, zańsyz áreketke baryp, kólikti toqtatyp, aiypturaqqa qoiǵan.
Tekserý barysynda kólikten esirtki tabylmaǵan. Osydan keiin olar oqiǵa ornynan ketip qalǵan.
Keiin M. men E. aiypturaqta turǵan kóliktiń tirkemesine zańsyz kirip, «L.» JShS-ne tiesili 1169 dana maining qurylǵysyn urlap ketken. Keltirilgen shyǵyn kólemi 100 million teńgeden asqan.
Sot barysynda B., N. jáne A.-ǵa taǵylǵan bopsalaý aiyby dáleldenbedi, olar bul epizod boiynsha aqtaldy.
Sonymen qatar:
• B.-nyń áreketi de qaita saralanyp, ol úsh jylǵa sottaldy jáne ómir boiyna belgili bir qyzmetterdi atqarý quqyǵynan aiyryldy
• M. men E. urlyq jasaǵany úshin kináli dep tanyldy
• E.-ge amnistiia zańyna sáikes 4 jyl 9 ai 18 kún jaza taǵaiyndaldy
• M.-ǵa 4 jyl shartty jaza berildi
Jábirlenýshige keltirilgen 67 million teńgeden astam shyǵyn sottalǵandardan ortaq tártippen óndiriletin boldy.
Úkim áli zańdy kúshine engen joq.
