2027 jyldan bastap Qazaqstan densaýlyq saqtaý salasyn qarjylandyrýdyń saqtandyrý modeline kezeń-kezeńimen kóshýdi josparlap otyr. Jańa zań sheńberinde Túrkistan oblysynda atqarylyp jatqan jumystar oblys ákimi Nuralhan Kósherovtiń tóraǵalyǵymen ótken májiliste talqylandy. Jiynda ákim salaǵa jaýapty basshylarǵa kiris salasynyń ókilderimen birlesip jumystardy shiratýdy tapsyrdy,- dep habarlaidy Dalanews.kz
Memleket basshysy mindetti áleýmettik meditsinalyq saqtandyrý (MÁMS) týraly Zańǵa engizilgen mańyzdy ózgeristerge qol qoiǵany belgili. Negizgi maqsat – birtutas ári ashyq júie. Qujatta jarnalar kólemi, meditsinalyq qyzmetterdiń qoljetimdiligi men sapasy, sonymen qatar halyqty qamtý aiasyn keńeitýge qatysty mańyzdy ózgerister engizilgen. Jańashyldyqtyń basty máni – biýdjet múmkindikteri men halyqtyń qajettilikterin eskere otyryp, biryńǵai bazalyq memlekettik meditsinalyq kómek paketiniń qurylýy. Bul qadam densaýlyq saqtaý júiesin turaqty, ádil jáne qoljetimdi etýge baǵyttalǵan.
«Áleýmettik meditsinalyq saqtandyrý qory» KEAQ Túrkistan oblysy boiynsha filialynyń direktory Bahyt Ismahanbetov oblystaǵy saqtandyrý júiesiniń jai-kúii men aldaǵy josparlar jóninde baiandama jasap, ár azamattyń MÁMS júiesine qatysýdyń óz paidasyn túsinip, belsendilik tanytýynyń mańyzdylyǵyna toqtaldy. Aitýynsha, bul bastamalar 2027 jyldan bastap qarjylandyrýdyń saqtandyrý úlgisie basymdyq berýge múmkindik jasaidy. Densaýlyq saqtaý júiesiniń shyǵyndaryn qarjylandyrýdy 65% – MÁMS júiesi esebinen, 35% – memlekettik biýdjet esebinen júrgizý engizilmek. Bul úlgi halyqtyń barlyq sanatyna meditsinalyq kómekti ádil jáne teńdei qoljetimdi etýdi kózdeidi. Sonymen qatar, MÁMS júiesimen qamtylǵan halyq úlesi 95%-ǵa deiin jetkiziledi dep josparlanyp otyr. Sońǵy derekterge sáikes, oblys turǵyndarynyń 83%-dan astamy saqtandyrylǵan.
Memleket basshysynyń tapsyrmasy aiasynda 2026 jyldan bastap «Biryńǵai meditsinalyq kómek paketi» iske qosylady. Jańa zańǵa sáikes, Meditsinalyq jáne farmatsevtikalyq baqylaý komitetine (MFBK) meditsinalyq uiymdardyń qyzmetine jedel baqylaý jasaý jáne óreskel buzýshylyqtarǵa sotsyz áreket etý quqyǵy beriledi. Bul patsientter quqyǵyn qorǵaý men qyzmet sapasyn arttyrýǵa baǵyttalǵan mańyzdy qadam.
Qazaqstanda densaýlyq saqtaý salasyn saqtandyrý modeline kóshirý – azamattardyń ómir súrý sapasyn arttyrý, meditsinalyq qyzmetterdiń ádilettiligin qamtamasyz etý jáne qarjylyq turaqtylyqty nyǵaitý jolyndaǵy mańyzdy reforma. Túrkistan oblysynda bul baǵyttaǵy jumystar júieli túrde júrgizilip jatyr. Endigi maqsat – halyqty jan-jaqty aqparattandyryp, saqtandyrý júiesine tolyqtai tartý.
