2027 جىلدان باستاپ قازاقستان دەنساۋلىق ساقتاۋ سالاسىن قارجىلاندىرۋدىڭ ساقتاندىرۋ مودەلىنە كەزەڭ-كەزەڭىمەن كوشۋدى جوسپارلاپ وتىر. جاڭا زاڭ شەڭبەرىندە تۇركىستان وبلىسىندا اتقارىلىپ جاتقان جۇمىستار وبلىس اكىمى نۇرالحان كوشەروۆتىڭ توراعالىعىمەن وتكەن ماجىلىستە تالقىلاندى. جيىندا اكىم سالاعا جاۋاپتى باسشىلارعا كىرىس سالاسىنىڭ وكىلدەرىمەن بىرلەسىپ جۇمىستاردى شيراتۋدى تاپسىردى،- دەپ حابارلايدى Dalanews.kz
مەملەكەت باسشىسى مىندەتتى الەۋمەتتىك مەديسينالىق ساقتاندىرۋ (ءمامس) تۋرالى زاڭعا ەنگىزىلگەن ماڭىزدى وزگەرىستەرگە قول قويعانى بەلگىلى. نەگىزگى ماقسات – ءبىرتۇتاس ءارى اشىق جۇيە. قۇجاتتا جارنالار كولەمى، مەديسينالىق قىزمەتتەردىڭ قولجەتىمدىلىگى مەن ساپاسى، سونىمەن قاتار حالىقتى قامتۋ اياسىن كەڭەيتۋگە قاتىستى ماڭىزدى وزگەرىستەر ەنگىزىلگەن. جاڭاشىلدىقتىڭ باستى ءمانى – بيۋدجەت مۇمكىندىكتەرى مەن حالىقتىڭ قاجەتتىلىكتەرىن ەسكەرە وتىرىپ، ءبىرىڭعاي بازالىق مەملەكەتتىك مەديسينالىق كومەك پاكەتىنىڭ قۇرىلۋى. بۇل قادام دەنساۋلىق ساقتاۋ جۇيەسىن تۇراقتى، ءادىل جانە قولجەتىمدى ەتۋگە باعىتتالعان.
«الەۋمەتتىك مەديسينالىق ساقتاندىرۋ قورى» كەاق تۇركىستان وبلىسى بويىنشا فيليالىنىڭ ديرەكتورى باحىت يسماحانبەتوۆ وبلىستاعى ساقتاندىرۋ جۇيەسىنىڭ جاي-كۇيى مەن الداعى جوسپارلار جونىندە بايانداما جاساپ، ءار ازاماتتىڭ ءمامس جۇيەسىنە قاتىسۋدىڭ ءوز پايداسىن ءتۇسىنىپ، بەلسەندىلىك تانىتۋىنىڭ ماڭىزدىلىعىنا توقتالدى. ايتۋىنشا، بۇل باستامالار 2027 جىلدان باستاپ قارجىلاندىرۋدىڭ ساقتاندىرۋ ۇلگىسىە باسىمدىق بەرۋگە مۇمكىندىك جاسايدى. دەنساۋلىق ساقتاۋ جۇيەسىنىڭ شىعىندارىن قارجىلاندىرۋدى 65% – ءمامس جۇيەسى ەسەبىنەن، 35% – مەملەكەتتىك بيۋدجەت ەسەبىنەن جۇرگىزۋ ەنگىزىلمەك. بۇل ۇلگى حالىقتىڭ بارلىق ساناتىنا مەديسينالىق كومەكتى ءادىل جانە تەڭدەي قولجەتىمدى ەتۋدى كوزدەيدى. سونىمەن قاتار، ءمامس جۇيەسىمەن قامتىلعان حالىق ۇلەسى 95%-عا دەيىن جەتكىزىلەدى دەپ جوسپارلانىپ وتىر. سوڭعى دەرەكتەرگە سايكەس، وبلىس تۇرعىندارىنىڭ 83%-دان استامى ساقتاندىرىلعان.
مەملەكەت باسشىسىنىڭ تاپسىرماسى اياسىندا 2026 جىلدان باستاپ «ءبىرىڭعاي مەديسينالىق كومەك پاكەتى» ىسكە قوسىلادى. جاڭا زاڭعا سايكەس، مەديسينالىق جانە فارماسيەۆتيكالىق باقىلاۋ كوميتەتىنە (مفبك) مەديسينالىق ۇيىمداردىڭ قىزمەتىنە جەدەل باقىلاۋ جاساۋ جانە ورەسكەل بۇزۋشىلىقتارعا سوتسىز ارەكەت ەتۋ قۇقىعى بەرىلەدى. بۇل پاسيەنتتەر قۇقىعىن قورعاۋ مەن قىزمەت ساپاسىن ارتتىرۋعا باعىتتالعان ماڭىزدى قادام.
قازاقستاندا دەنساۋلىق ساقتاۋ سالاسىن ساقتاندىرۋ مودەلىنە كوشىرۋ – ازاماتتاردىڭ ءومىر ءسۇرۋ ساپاسىن ارتتىرۋ، مەديسينالىق قىزمەتتەردىڭ ادىلەتتىلىگىن قامتاماسىز ەتۋ جانە قارجىلىق تۇراقتىلىقتى نىعايتۋ جولىنداعى ماڭىزدى رەفورما. تۇركىستان وبلىسىندا بۇل باعىتتاعى جۇمىستار جۇيەلى تۇردە جۇرگىزىلىپ جاتىر. ەندىگى ماقسات – حالىقتى جان-جاقتى اقپاراتتاندىرىپ، ساقتاندىرۋ جۇيەسىنە تولىقتاي تارتۋ.
