Túrkistan oblysynda otshashý atamyn dep eki bala jaraqat aldy, dep habarlaıdy Dalanews.kz QR Oqý-aǵartý mınıstrliginiń Balalardyń quqyqtaryn qorǵaý komıtetine silteme jasap.

Oqıǵa Saryaǵash qalasynda jeke turǵyn úıdiń aýlasynda bolǵan. Jasóspirimder pırotehnıkalyq buıymdardy eresekterdiń baqylaýynsyz paıdalanǵan.

Vedomstvonyń málimetinshe, pırotehnıkadan zardap shekken balalardyń jaǵdaıy turaqty, ómirine qaýip tónip turǵan joq. Olar aýrýhanaǵa jetkizilip, qajetti medısınalyq kómek kórsetilýde.

Osyǵan baılanysty Balalardyń quqyqtaryn qorǵaý komıteti mereke kúnderi qaýipsizdik sharalaryn kúsheıtý týraly eldegi barlyq bilim berý uıymdaryna resmı hat joldaǵan. Sonymen qatar eldi mekender aýmaǵynda pırotehnıkalyq buıymdardy qoldanýǵa tyıym salynǵany eskertildi.

Aıta keteıik, eger zańbuzýshylyqty 16 jasqa tolmaǵan bala jasasa, jaýapkershilik ata-anasyna júkteledi. Bul jaǵdaıda 20 aılyq eseptik kórsetkish mólsherinde (78 640 teńge) aıyppul qarastyrylǵan.