Túrkistan oblysynda «Damý jáne erte aralasý ortalyǵynyń» saltanaty ashylýy ótti, dep habarlaidy Dalanews.kz
Is-sharaǵa QR DSM Ana men bala densaýlyǵyn saqtaý departamentiniń direktory Maǵripa Embergenova, BUU «IýNISEF» Balalar qorynyń densaýlyq saqtaý baǵdarlamasynyń úilestirýshisi Baýyrjan Jýsýpov jáne Túrkistan oblysynyń densaýlyq saqtaý basqarmasynyń basshysy Ashan Baidývaliev qatysyp, oblysymyzda erekshe qajettilikteri bar balalarǵa erte kómek kórsetý men erte aralasý júiesin damytý máselelerin talqylady.
Kentaý qalalyq emhanasynda ashylǵan «Damý jáne erte aralasý ortalyǵynyń» qyzmeti balalardyń ómiriniń eń erte kezeńderindegi damý aýytqýlaryn anyqtaýǵa jáne jan-jaqty kómek kórsetýge baǵyttalǵan. Bul balalyq shaqtaǵy múgedektik deńgeiin tómendetip qana qoimai, balalar men olardyń otbasylarynyń ómir súrý sapasyn aitarlyqtai jaqsartýǵa múmkindik beredi.
Ortalyqta jańa týǵan náresteler men erte jastaǵy balalarǵa skriningter júrgizý, aýtizmge túrlendirilgen skriningtik test, turmystyq zorlyq-zombylyq pen balaǵa qatygezdiktiń aldyn alý, patronajdyq baqylaýdyń tiimdiligin uiymdastyrý, balalar men olardyń otbasylaryna qajettilikti anyqtaý jáne vedomstvoaralyq kómekti uiymdastyrý, bes jasqa deiingi balalardyń zańdy ókilderine kútim máseleleri boiynsha keńes berý, balalardyń durys tamaqtanýyn uiymdastyrý siiaqty kóptegen kómek kórsetiletin bolady.
Ortalyqtyń quramyna aimaqtyq dáriger, pediatr, nevropatolog, psiholog, áleýmettik qyzmetker, patronajdyq meiirgerler jáne beiindi mamandar tartylǵan.
