Májiliste oblystyq jolaýshylar kóligi jáne avtomobil joldary basqarmasynyń basshysy R.Ibragimov, «QazAvtoJol» UK» AQ Túrkistan oblystyq filialy direktorynyń orynbasary E.Kenjehanov, «Ulttyq jol aktivteri sapasy ortalyǵy» RMK Túrkistan oblysy boiynsha filialynyń direktory M. Ahmetov baiandama jasady.
Biyl avtomobil joldarynyń qurylys-jóndeý jumystarymen 400-ge jýyq nysan, ne 1250 shaqyrymdai joldar men eldi meken kósheleri qamtylyp, aǵymdaǵy jyly 780 shaqyrymnan astam jol paidalanýǵa beriledi dep kútilýde. Jyl qorytyndysymen oblystyq jáne aýdandyq mańyzy bar avtomobil joldarynyń jaqsy jáne qanaǵatty jaǵdaidaǵy úlesin 79%-dan 81,4%-ǵa deiin arttyrý josparlanýda.
Jinalysta avtomobil joldarynyń sapasyn arttyrý boiynsha atqarylǵan jumystar jáne qabyldanýy qajet is-sharalar talqylandy. Odan bólek, saladaǵy ózekti máselelerge toqtalyp, usynystar qaraldy.
Sondai-aq jóndeýden ótken joldardy merziminen buryn buzylýyn boldyrmaý úshin aýyr salmaqty júk kólikteriniń qozǵalysyn retteý júkteldi. Oblys ákimi Ómirzaq Shókeev oblys úshin mańyzdy Shymkent, Túrkistan, Saryaǵash ainalma joldarynyń qurylysyn bastaý boiynsha QR Indýstriia jáne infraqurylymdyq damý ministrligimen tiisti jumystar júrgizý qajettigin aitty.
Túrkistan oblysyndaǵy joldardyń jalpy uzyndyǵy 18 myń shaqyrymdy quraidy. Ótken jyly atqarylǵan jumystardyń nátijesinde oblystyq jáne aýdandyq mańyzy bar avtomobil joldarynyń jaqsy jáne qanaǵattanarlyq jaǵdaidaǵy úlesi 74,1%-dan 79%-ǵa qol jetkizildi. 2020 jyly 900-ge jýyq ne 2 myń shaqyrymǵa jýyq avtomobil joldary qamtyldy.
Qurylys-montajdaý jumystaryn atqarý kezinde kemshilikterge jol bergeni úshin merdiger, tehnikalyq jáne avtorlyq qadaǵalaýshy mekemelerge aiyppuldar salyndy. Eskertýler berilip, 58 myń sharshy metrden astam asfalt jamylǵysy, 6,2 shaqyrym jol negizi buzylyp, qaita salyndy. «Sapaly jol-Adaldyq alańy» jobasy aiasynda anyqtalǵan barlyq aqaýlar qalpyna keltirildi.
