Búginde Túrkistan oblysyndaǵy 1 093 mektepte 553 myńnan astam oqýshy bilim alýda. Onyń ishinde, 33 884 oqýshy 11-synypty bitirip jatyr. Olardyń 2 313-i «Altyn belgige», 2 400-i «Úzdik atestatqa» úmitker. Sondaı-aq, 9-synypty 45 myńǵa jýyq oqýshy bitiredi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.  

Óńirde testileýge qatyspaıtyn bitirýshilerdi «Jumysshy mamandyqtar jyly» aıasynda kolejderge oqýǵa tartý boıynsha jumystar júzege asýda. Bıyl 11-synyp túlekteri úshin mektep bitirý is-sharasy 23 mamyrda, ıaǵnı búgin barlyq mektepterde uıymdastyrylýda.

Sondaı-aq, 1-11 synyp oqýshylary úshin «Bilimim – Otanyma» atty biryńǵaı synyp saǵaty ótkizilýde. Bul oqýshylardyń jyl boıy alǵan bilimin qorytyndylaıdy.

Qorytyndy memlekettik emtıhandar 9-synyptar úshin 29 mamyr-10 maýsym aralyǵynda, al 11-synyptar úshin 30 mamyr-16 maýsym aralyǵynda ótedi. Al, Ulttyq biryńǵaı testileýge oblys boıynsha 27 386 túlek qatysady.

Testke qatyspaıtyn 6 498 túlek kolejderge barady. Sonymen qatar, bıyl oqytý tiline qaramastan 5, 6, 7, 8 jáne 10-synyp oqýshylary qazaq tili men ádebıeti páninen CREF standartyna sáıkes, aralyq emtıhan tapsyrady. Bul oqýshylardyń memlekettik tildi meńgerý deńgeıin baǵalaýǵa múmkindik beredi.