بۇگىندە تۇركىستان وبلىسىنداعى 1 093 مەكتەپتە 553 مىڭنان استام وقۋشى ءبىلىم الۋدا. ونىڭ ىشىندە، 33 884 وقۋشى 11-سىنىپتى ءبىتىرىپ جاتىر. ولاردىڭ 2 313ء-ى «التىن بەلگىگە»، 2 400ء-ى «ۇزدىك اتتەستاتقا» ۇمىتكەر. سونداي-اق، 9-سىنىپتى 45 مىڭعا جۋىق وقۋشى بىتىرەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.  

وڭىردە تەستىلەۋگە قاتىسپايتىن بىتىرۋشىلەردى «جۇمىسشى ماماندىقتار جىلى» اياسىندا كوللەدجدەرگە وقۋعا تارتۋ بويىنشا جۇمىستار جۇزەگە اسۋدا. بيىل 11-سىنىپ تۇلەكتەرى ءۇشىن مەكتەپ ءبىتىرۋ ءىس-شاراسى 23 مامىردا، ياعني بۇگىن بارلىق مەكتەپتەردە ۇيىمداستىرىلۋدا.

سونداي-اق، 1-11 سىنىپ وقۋشىلارى ءۇشىن «ءبىلىمىم – وتانىما» اتتى ءبىرىڭعاي سىنىپ ساعاتى وتكىزىلۋدە. بۇل وقۋشىلاردىڭ جىل بويى العان ءبىلىمىن قورىتىندىلايدى.

قورىتىندى مەملەكەتتىك ەمتيحاندار 9-سىنىپتار ءۇشىن 29 مامىر-10 ماۋسىم ارالىعىندا، ال 11-سىنىپتار ءۇشىن 30 مامىر-16 ماۋسىم ارالىعىندا وتەدى. ال، ۇلتتىق ءبىرىڭعاي تەستىلەۋگە وبلىس بويىنشا 27 386 تۇلەك قاتىسادى.

تەستكە قاتىسپايتىن 6 498 تۇلەك كوللەدجدەرگە بارادى. سونىمەن قاتار، بيىل وقىتۋ تىلىنە قاراماستان 5، 6، 7، 8 جانە 10-سىنىپ وقۋشىلارى قازاق ءتىلى مەن ادەبيەتى پانىنەن CREF ستاندارتىنا سايكەس، ارالىق ەمتيحان تاپسىرادى. بۇل وقۋشىلاردىڭ مەملەكەتتىك ءتىلدى مەڭگەرۋ دەڭگەيىن باعالاۋعا مۇمكىندىك بەرەدى.