Túrkistan oblysynda Baidibek aýdandyq bilim bóliminiń laýazymdy tulǵalaryna qatysty biýdjet qarajatyn júieli túrde jymqyrý faktisi boiynsha sot úkimi shyqty, dep habarlaidy Dalanews.kz.
Tergeýdi QMA Túrkistan oblysy boiynsha departamenti júrgizdi.
Basshylar, býhgalterler jáne ekonomisterdi qosa alǵanda 18 laýazymdy tulǵa jalaqy men ózge de tólemderge arnalǵan biýdjettik ótinimderdi negizsiz ulǵaitý arqyly aýdannyń 49 jalpy bilim beretin mektep qarajatyn iemdený shemasyn uiymdastyrǵan.
Býhgalteriia qyzmetkerleri elektrondyq júielerge ádeii jalǵan málimetter engizip otyrǵan. Tólem vedomostary men esep paraqtaryna is júzinde jumys istemegen adamdar engizilgen nemese jalaqy men ústemeaqylardyń kólemi negizsiz ósirilgen.
Operatsiialarǵa zańdy sipat berý úshin qyzmettik jazbalar, buiryqtar, esep vedomostary men jumys ýaqyty tabelderi siiaqty jalǵan qujattar paidalanylǵan. Qujattardyń bir bóligi tólemder júrgizilgennen keiin keri kúnmen rásimdelip nemese eseptilikti sáikestendirý maqsatynda túzetilgen.
Qarajat jalǵan tulǵalardyń, onyń ishinde týystary men tanystarynyń banktik shottaryna aýdarylyp, keiin aldyn ala kelisilgen úlester boiynsha qatysýshylar arasynda bólingen.
Nátijesinde memleketke keltirilgen zalal 583 mln teńgeden asty.
Tergeý barysynda kúdiktiler keltirilgen shyǵyndy tolyq ótedi.
Sot 14 adamdy 3 jyldan 7 jylǵa deiin bas bostandyǵynan aiyrý jazasyna kesti. Taǵy 4 adamǵa qatysty is raqymshylyqqa bailanysty toqtatyldy. Úkim zańdy kúshine endi.
