Túrkistan oblysynda balyq sharýashylyǵyn damytýǵa basymdyq beriledi, – dep habarlaıdy Dalanews.kz
Túrkistanda oblys ákimi Nuralhan Kósherovtiń tóraǵalyǵymen jınalys ótti. Oblys ákimi balyq sharýashylyǵyn damytyp, ónimdilik pen eskporttyq áleýetti arttyrý jóninde naqty tapsyrmalar berdi.
— Túrkistan oblysynda balyq sharýashylyǵyn damytý boıynsha bekitilgen mejeni oryndaý baǵytynda balyq ósirý kólemin arttyrýdy tapsyramyn. Bul baǵytta jumysty shıratyńyzdar. Balyq ónimi kólemin arttyrýǵa múmkindik bar dep oılaımyn. Balyq sharýashylyǵymen aınalysamyn degen kásipkerlerge qoldaý kórsetip, qolaıly múmkindik usynyńyzdar. Balyq sharýashylyǵyn júrgizý úshin bekitilip berilgen 104 sý aıdynyn jáne balyq ósirýmen aınalysatyn sharýashylyqtardy qaıtadan taldap, zerdeleńizder. Jaýapty basqarma aýdan, qala ákimdikterimen birlese jumys istep, sharýashylyqta óndirilgen ónim kóleminiń artýy qadaǵalanýy tıis, – degen Nuralhan Kósherov jaýapty basshylarǵa osy salany damytý boıynsha tyń usynystar men jobalardy ázirleýdi tapsyrdy.
Oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Bolysbek Sháripbekovtiń aıtýynsha, Qazaqstan Respýblıkasy Úkimetiniń tapsyrmasyna sáıkes 2030 jylǵa deıin Túrkistan oblysy boıynsha taýarly balyq ósirý kólemin 20 myń tonnaǵa, al bıyl 7467 tonnaǵa jetkizý josparlanǵan. Qazirgi tańda, balyq ósirýmen aınalysatyn sharýashylyqtardyń sany 245-ke jetip, onyń 164-i oblysaralyq basseıindik balyq sharýashylyǵy ınspeksıasymen zańdastyrylǵan. Búginde 4 aıdyń qorytyndysymen 176 tonna kásipshilik balyq aýlaýǵa ruqsat berilip, memlekettik búdjetke 5,7 mln. teńge túsim tústi.
Elimizde jasandy balyq ósirýden Túrkistan oblysy kósh bastap tur. Oblys ákiminiń tapsyrmasyn iske asyrý maqsatynda 2025-2027 jyldarǵa arnalǵan balyq sharýashylyǵyn damytý jospary bekitilip, 905 tonna balyq óndirildi. Bekitilgen josparǵa sáıkes, bıyl oblys aýmaǵynan 16 balyq ósirý sharýashylyqtaryn ashý kózdelip otyr.
Sonymen qatar oblysta eksportqa baǵyttalǵan 4 iri kásiporyn jumys isteıdi. Jyl basynan beri 1069,5 tonna balyq ónimderi shet memleketterge eksporttaldy. Búginde balyq sharýashylyǵyn damytýǵa memlekettik qoldaýlar qarastyrylǵan. Atap aıtsaq, oblystyq búdjetten akvaósirýdi sýbsıdıalaý úshin 2025 jylǵa 500,0 mln teńge bólinip, 4 myń 586 tonna balyq azyǵy, 500 myń balyq shabaǵy, 4 dana bıologıalyq ǵylymı negizdemeler sýbsıdıalandy. Al respýblıkalyq búdjetten ınvestısıalyq salymdar kezinde balyq sharýashylyǵy sýbektisi shekken shyǵystardyń bir bóligin sýbsıdıalaýǵa 120 mln. 500 myń teńge bólinip, 3,2 mln. teńgesi ıgerildi.
Odan bólek, «Aýyl amanaty» baǵdarlamasyna respýblıkalyq búdjetten 7,4 mlrd. teńge jáne qaıtarym qarajatynan 1,3 mlrd. josparlanǵan. Atalǵan baǵdarlamanyń IV baǵytyna sáıkes, balyq sharýashylyǵyn damytý kózdelip, 2025 jylǵa 71 jobaǵa 698 mln teńge qarastyrylýda.
