Búginde ondaǵy Borlysai aýyldyq okrýgine qarasty Aqtas, Qoshqarata jáne Keńsai eldi mekenderiniń kóshe shamdary jarqyrap, tún kórinisi tiisti talaptarǵa sáikestendirildi.
Elbasy N.Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasyndaǵy «Týǵan jer» baǵdarlamasynyń aiasynda qolǵa alynǵan sharaǵa bastamashy bolǵan báidibektik azamat, «Qurmet» ordeniniń iegeri, filantrop – Oralbek Botbai. Kásipker úsh aýyldyń boiyn jalǵaityn uzyndyǵy 14 shaqyrymnan (14,341 shq.) astam jolǵa 438 baǵana ornatyp, jaryq shamdaryn qosyp berdi.
Osynaý qýanyshty jaǵdaiǵa qatysqan oblys ákiminiń orynbasary Ulasbek Sádibekov quttyqtaý sóz sóilep, basqa qalada júrse de týǵan jerin umytpai, Borlysai aýyldyq okrýginiń áleýetin kóterýge óz úlesin qosyp júrgen O.Botbaiǵa oblys ákiminiń Alǵys hatyn tabys etip, iyǵyna shapan japty.
Buǵan deiin de jerlesterin túrli igi isterimen qýantyp júrgen metsenat aldaǵy ýaqytta da týǵan jeri – Báidibekti kórkeitip, damytýda aianbaitynyn jetkizdi.
Jaryq shamdarynyń jalpy quny – 245 mln teńge. Kóshe shamdary 14 fýnktsiiany qatar atqara alady. Máselen, uialy telefondy qýattaý, wi-fi taratý, kóshedegi kólik qozǵalysyn beine baqylaýǵa túsirý jáne t.b. syndy qyzmetteri bar. Sondai-aq, taǵy bir erekshelik – bul kóshe shamdary qarańǵylyq pen jaryqty avtomatty túrde sezinip, kún raiyna qarai qýat berý mólsherin ózdiginen rettep otyrady. Nátijesinde 75% energiia qýaty únemdeletin bolady.
Kásipkerdiń demeýshiligi munymen toqtamaq emes. Dál qazirgi ýaqytta O.Botbaidyń jetekshiligimen Báidibek aýdanynyń ortalyǵy Shaian aýylyndaǵy M.Áýezov kóshesinde uzyndyǵy 3 shaqyrymnan astam joldyń boiyna 77 baǵana ornatylyp, jaryq shamdarynyń qurylysy júrýde.
Túrkistan oblysy ákiminiń baspasóz qyzmeti
