بۇگىندە ونداعى بورلىساي اۋىلدىق وكرۋگىنە قاراستى اقتاس، قوشقاراتا جانە كەڭساي ەلدى مەكەندەرىنىڭ كوشە شامدارى جارقىراپ، ءتۇن كورىنىسى ءتيىستى تالاپتارعا سايكەستەندىرىلدى.
ەلباسى ن.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى «تۋعان جەر» باعدارلاماسىنىڭ اياسىندا قولعا الىنعان شاراعا باستاماشى بولعان بايدىبەكتىك ازامات، «قۇرمەت» وردەنىنىڭ يەگەرى، فيلانتروپ – ورالبەك بوتباي. كاسىپكەر ءۇش اۋىلدىڭ بويىن جالعايتىن ۇزىندىعى 14 شاقىرىمنان (14،341 شق.) استام جولعا 438 باعانا ورناتىپ، جارىق شامدارىن قوسىپ بەردى.
وسىناۋ قۋانىشتى جاعدايعا قاتىسقان وبلىس اكىمىنىڭ ورىنباسارى ۇلاسبەك سادىبەكوۆ قۇتتىقتاۋ ءسوز سويلەپ، باسقا قالادا جۇرسە دە تۋعان جەرىن ۇمىتپاي، بورلىساي اۋىلدىق وكرۋگىنىڭ الەۋەتىن كوتەرۋگە ءوز ۇلەسىن قوسىپ جۇرگەن و.بوتبايعا وبلىس اكىمىنىڭ العىس حاتىن تابىس ەتىپ، يىعىنا شاپان جاپتى.
اۋىل تۇرعىندارىنىڭ اتىنان ءسوز العان قوشقاراتا اۋىلىنىڭ ءبيى، ارداگەر-ۇستاز ە.قىرىقبايەۆ ورالبەك قوجامجارۇلىنا اۋىل تۇرعىندارىنىڭ العىسىن جەتكىزدى.
بۇعان دەيىن دە جەرلەستەرىن ءتۇرلى يگى ىستەرىمەن قۋانتىپ جۇرگەن مەسەنات الداعى ۋاقىتتا دا تۋعان جەرى – بايدىبەكتى كوركەيتىپ، دامىتۋدا ايانبايتىنىن جەتكىزدى.
جارىق شامدارىنىڭ جالپى قۇنى – 245 ملن تەڭگە. كوشە شامدارى 14 فۋنكسيانى قاتار اتقارا الادى. ماسەلەن، ۇيالى تەلەفوندى قۋاتتاۋ، wi-fi تاراتۋ، كوشەدەگى كولىك قوزعالىسىن بەينە باقىلاۋعا ءتۇسىرۋ جانە ت.ب. سىندى قىزمەتتەرى بار. سونداي-اق، تاعى ءبىر ەرەكشەلىك – بۇل كوشە شامدارى قاراڭعىلىق پەن جارىقتى اۆتوماتتى تۇردە سەزىنىپ، كۇن رايىنا قاراي قۋات بەرۋ مولشەرىن وزدىگىنەن رەتتەپ وتىرادى. ناتيجەسىندە 75% ەنەرگيا قۋاتى ۇنەمدەلەتىن بولادى.
كاسىپكەردىڭ دەمەۋشىلىگى مۇنىمەن توقتاماق ەمەس. ءدال قازىرگى ۋاقىتتا و.بوتبايدىڭ جەتەكشىلىگىمەن بايدىبەك اۋدانىنىڭ ورتالىعى شايان اۋىلىنداعى م.اۋەزوۆ كوشەسىندە ۇزىندىعى 3 شاقىرىمنان استام جولدىڭ بويىنا 77 باعانا ورناتىلىپ، جارىق شامدارىنىڭ قۇرىلىسى جۇرۋدە.
تۇركىستان وبلىسى اكىمىنىڭ باسپا ءسوز قىزمەتى
