Biyl Túrkistan oblysynda alǵash ret modýldi lager qolǵa alyndy. Óńirdiń 5 aýdanyndaǵy jazǵy saýyqtyrý lagerlerinde 54 modýldik jatyn bólme, 2 ashana, 4 ájethana (dýshymen) ornatylady,- dep habarlaidy Dalanews.kz
Bul bastama óńirdegi balalardemalysyn uiymdastyrý isindegi basty túitkil — oryn tapshylyǵy men sanitarlyq talaptardyń saqtalmaýy máselelerin sheshýge baǵyttalǵan. Modýldik konstrýktsiialar — qazirgi zaman talabyna sai, tez ornatylatyn, ekologiialyq ári tiimdi sheshim. Bul tásil ásirese jaz mezgilinde balalardy jyldam ári sapaly túrde jaiǵastyrý úshin óte qolaily.
Atap aitqanda, «Tólebi Nury», «Taý shyńy», «Balaýsa», «Taý barysy» jáne «Baldáýren» lagerlerine ornatylatyn modýlder bir aýysymda myńnan astam balany qabyldaýǵa múmkindik beredi. Jalpy jazǵy maýsymda bul lagerlerde 10 myńǵa jýyq bala demalady dep josparlanyp otyr. Qazirgi tańda jatyn oryndarmen qatar, sanitarlyq toraptar men ashanalar da daiyndalýda.
Bul mańyzdy jobany Túrkistan oblysynyń ákimi Nuralhan Kósherov tikelei baqylaýǵa alyp, tapsyrmalardyń ýaqytyly oryndalýyn qadaǵalaýdy júktedi. Al oblys ákiminiń orynbasary Beisenbai Tájibaev arnaiy baryp, lagerlerdiń maýsymǵa daiyndyǵyn pysyqtady. Ol ásirese qaýipsizdik, sanitarlyq tazalyq jáne tárbieshilerdiń biliktiligine basa nazar aýdardy.
Sondai-aq, jazǵy saýyqtyrý keshenderinde aǵymdaǵy jóndeý jumystary qarqyndy júrgizilýde. Óńirdegi «Samal» jazǵy saýyqtyrý lageri 20 jyldan beri alǵash ret kúrdeli jóndeýden ótti. Munda terezeler men esikter jańartylyp, ishki ájethanalar ornatylyp, ǵimaratqa syrlaý jáne ákteý jumystary uiymdastyryldy.
Jalpy alǵanda, Túrkistan oblysynda biyl 41 myńnan astam bala 31 jazǵy saýyqtyrý lagerlerinde demalyspen qamtylady. Balalarǵa arnalǵan bul demalys tek tynyǵý emes, sonymen qatar tulǵalyq, shyǵarmashylyq jáne rýhani damýǵa baǵyttalǵan mańyzdy kezeń. Osyǵan orai lagerlerde ár kúnge josparlanǵan oiyn-saýyq, mádeni-sporttyq is-sharalar uiymdastyrylady. Aita keteiik, 1 maýsymnan bastap Túrkistan oblysynyń balalary jazǵy saýyqtyrý kezeńi bastalady.
