بيىل تۇركىستان وبلىسىندا العاش رەت ءمودۋلدى لاگەر قولعا الىندى. ءوڭىردىڭ 5 اۋدانىنداعى جازعى ساۋىقتىرۋ لاگەرلەرىندە 54 مودۋلدىك جاتىن بولمە، 2 اسحانا، 4 اجەتحانا (دۋشىمەن) ورناتىلادى،- دەپ حابارلايدى Dalanews.kz
بۇل باستاما وڭىردەگى بالالاردەمالىسىن ۇيىمداستىرۋ ىسىندەگى باستى تۇيتكىل — ورىن تاپشىلىعى مەن سانيتارلىق تالاپتاردىڭ ساقتالماۋى ماسەلەلەرىن شەشۋگە باعىتتالعان. مودۋلدىك كونسترۋكسيالار — قازىرگى زامان تالابىنا ساي، تەز ورناتىلاتىن، ەكولوگيالىق ءارى ءتيىمدى شەشىم. بۇل ءتاسىل اسىرەسە جاز مەزگىلىندە بالالاردى جىلدام ءارى ساپالى تۇردە جايعاستىرۋ ءۇشىن وتە قولايلى.
اتاپ ايتقاندا، «تولەبي نۇرى»، «تاۋ شىڭى»، «بالاۋسا»، «تاۋ بارىسى» جانە «بالداۋرەن» لاگەرلەرىنە ورناتىلاتىن مودۋلدەر ءبىر اۋىسىمدا مىڭنان استام بالانى قابىلداۋعا مۇمكىندىك بەرەدى. جالپى جازعى ماۋسىمدا بۇل لاگەرلەردە 10 مىڭعا جۋىق بالا دەمالادى دەپ جوسپارلانىپ وتىر. قازىرگى تاڭدا جاتىن ورىندارمەن قاتار، سانيتارلىق توراپتار مەن اسحانالار دا دايىندالۋدا.
بۇل ماڭىزدى جوبانى تۇركىستان وبلىسىنىڭ اكىمى نۇرالحان كوشەروۆ تىكەلەي باقىلاۋعا الىپ، تاپسىرمالاردىڭ ۋاقىتىلى ورىندالۋىن قاداعالاۋدى جۇكتەدى. ال وبلىس اكىمىنىڭ ورىنباسارى بەيسەنباي تاجىبايەۆ ارنايى بارىپ، لاگەرلەردىڭ ماۋسىمعا دايىندىعىن پىسىقتادى. ول اسىرەسە قاۋىپسىزدىك، سانيتارلىق تازالىق جانە تاربيەشىلەردىڭ بىلىكتىلىگىنە باسا نازار اۋداردى.
سونداي-اق، جازعى ساۋىقتىرۋ كەشەندەرىندە اعىمداعى جوندەۋ جۇمىستارى قارقىندى جۇرگىزىلۋدە. وڭىردەگى «سامال» جازعى ساۋىقتىرۋ لاگەرى 20 جىلدان بەرى العاش رەت كۇردەلى جوندەۋدەن ءوتتى. مۇندا تەرەزەلەر مەن ەسىكتەر جاڭارتىلىپ، ىشكى اجەتحانالار ورناتىلىپ، عيماراتقا سىرلاۋ جانە اكتەۋ جۇمىستارى ۇيىمداستىرىلدى.
جالپى العاندا، تۇركىستان وبلىسىندا بيىل 41 مىڭنان استام بالا 31 جازعى ساۋىقتىرۋ لاگەرلەرىندە دەمالىسپەن قامتىلادى. بالالارعا ارنالعان بۇل دەمالىس تەك تىنىعۋ ەمەس، سونىمەن قاتار تۇلعالىق، شىعارماشىلىق جانە رۋحاني دامۋعا باعىتتالعان ماڭىزدى كەزەڭ. وسىعان وراي لاگەرلەردە ءار كۇنگە جوسپارلانعان ويىن-ساۋىق، مادەني-سپورتتىق ءىس-شارالار ۇيىمداستىرىلادى. ايتا كەتەيىك، 1 ماۋسىمنان باستاپ تۇركىستان وبلىسىنىڭ بالالارى جازعى ساۋىقتىرۋ كەزەڭى باستالادى.
