Túrkistan oblysynda biyl jaz maýsymynda 70-ke jýyq ashyq jaǵajai ashý josparlanyp otyr. Bul týraly óńirlik kommýnikatsiialar qyzmetinde ótken brifingte oblystyq Tótenshe jaǵdailar departamentiniń basqarma bastyǵy Orazgeldi Dúisen málimdedi, – dep habarlaidy Dalanews.kz
Orazgeldi Dúisenniń aitýynsha, óńirde shomylý maýsymy bastalmai jatyp, sýǵa ketý oqiǵalary kóbeigen. Jyl basynan beri oblys aýmaǵynda 30 adam sýǵa batyp, tilsiz jaýdyń qurbanyna ainalǵan. Onyń ishinde 13-i – jas balalar.
«Oblystaǵy basty problemalardyń biri – arnaiy shomylý oryndarynyń jetispeýshiligi. Máselen, ótken jyly tek 14 jaǵajai ǵana jumys istedi. Bul 2 millionnan asa turǵyny bar óńir úshin tym az. Sol sebepti oblys ákiminiń tapsyrmasymen biyl 70-ke jýyq jaǵajai ashý kózdelip otyr», – dedi maman.
Tótenshe jaǵdailar departamenti basshysynyń sózinshe, óńirde akvapark salý máselesi de qarastyrylýda. Bul, bir jaǵynan, halyqqa qaýipsiz demalys usynsa, ekinshi jaǵynan, stihiialyq shomylý oryndaryn azaitýǵa yqpal etpek.
Onyń aitýynsha, sýdaǵy qaiǵyly oqiǵalardyń basym bóligi – shamamen 45 paiyzy – kanaldar men aryqtarda oryn alady. Osyǵan bailanysty jyl basynan beri oblys aýmaǵynda 742 reid júrgizilip, qaýipsizdik erejelerin buzǵan 53 azamatqa jalpy somasy 730 million teńgege jýyq aiyppul salynǵan.
TJD ókilderi turǵyndardy sýǵa shomylý maýsymynda qaýipsizdik erejelerin qatań saqtaýǵa shaqyrdy. Ásirese balalardy qaraýsyz qaldyrmaý, tek ruqsat etilgen oryndarda shomylý jáne ishimdik iship sýǵa túspeý syndy qarapaiym erejelerdi saqtaý mańyzdy ekenin eskertti.
Jańa jaǵajailardyń naqty qaida ashylatyny ázirge naqtylanǵan joq. Alaida TJ departamenti men jergilikti ákimdikter bul baǵytta jumystardy bastap ketkenin málimdedi.
