تۇركىستان وبلىسىندا بيىل جاز ماۋسىمىندا 70-كە جۋىق اشىق جاعاجاي اشۋ جوسپارلانىپ وتىر. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە وبلىستىق توتەنشە جاعدايلار دەپارتامەنتىنىڭ باسقارما باستىعى ورازگەلدى دۇيسەن مالىمدەدى، – دەپ حابارلايدى Dalanews.kz
ورازگەلدى دۇيسەننىڭ ايتۋىنشا، وڭىردە شومىلۋ ماۋسىمى باستالماي جاتىپ، سۋعا كەتۋ وقيعالارى كوبەيگەن. جىل باسىنان بەرى وبلىس اۋماعىندا 30 ادام سۋعا باتىپ، ءتىلسىز جاۋدىڭ قۇربانىنا اينالعان. ونىڭ ىشىندە 13ء-ى – جاس بالالار.
«وبلىستاعى باستى پروبلەمالاردىڭ ءبىرى – ارنايى شومىلۋ ورىندارىنىڭ جەتىسپەۋشىلىگى. ماسەلەن، وتكەن جىلى تەك 14 جاعاجاي عانا جۇمىس ىستەدى. بۇل 2 ميلليوننان اسا تۇرعىنى بار ءوڭىر ءۇشىن تىم از. سول سەبەپتى وبلىس اكىمىنىڭ تاپسىرماسىمەن بيىل 70-كە جۋىق جاعاجاي اشۋ كوزدەلىپ وتىر»، – دەدى مامان.
توتەنشە جاعدايلار دەپارتامەنتى باسشىسىنىڭ سوزىنشە، وڭىردە اكۆاپارك سالۋ ماسەلەسى دە قاراستىرىلۋدا. بۇل، ءبىر جاعىنان، حالىققا ءقاۋىپسىز دەمالىس ۇسىنسا، ەكىنشى جاعىنان، ستيحيالىق شومىلۋ ورىندارىن ازايتۋعا ىقپال ەتپەك.
ونىڭ ايتۋىنشا، سۋداعى قايعىلى وقيعالاردىڭ باسىم بولىگى – شامامەن 45 پايىزى – كانالدار مەن ارىقتاردا ورىن الادى. وسىعان بايلانىستى جىل باسىنان بەرى وبلىس اۋماعىندا 742 رەيد جۇرگىزىلىپ، قاۋىپسىزدىك ەرەجەلەرىن بۇزعان 53 ازاماتقا جالپى سوماسى 730 ميلليون تەڭگەگە جۋىق ايىپپۇل سالىنعان.
تجد وكىلدەرى تۇرعىنداردى سۋعا شومىلۋ ماۋسىمىندا قاۋىپسىزدىك ەرەجەلەرىن قاتاڭ ساقتاۋعا شاقىردى. اسىرەسە بالالاردى قاراۋسىز قالدىرماۋ، تەك رۇقسات ەتىلگەن ورىنداردا شومىلۋ جانە ىشىمدىك ءىشىپ سۋعا تۇسپەۋ سىندى قاراپايىم ەرەجەلەردى ساقتاۋ ماڭىزدى ەكەنىن ەسكەرتتى.
جاڭا جاعاجايلاردىڭ ناقتى قايدا اشىلاتىنى ازىرگە ناقتىلانعان جوق. الايدا تج دەپارتامەنتى مەن جەرگىلىكتى اكىمدىكتەر بۇل باعىتتا جۇمىستاردى باستاپ كەتكەنىن مالىمدەدى.
