Túrkistan oblysynyń ákimi Nuralhan Kósherov Qazyǵurt aýdanyna issaparynda turǵyn úi kezeginde turǵan 40 otbasyna jańa páter kiltterin tapsyrdy,- dep habarlaidy Dalanews.kz.
Túrkistan oblysynda turǵyndardy baspanamen qamtý baǵytynda tiisti jumystar jalǵasyp jatyr. Osy rette Qazyǵurt aýylynda 2 qabatty, 8 páterli 5 turǵyn úidiń qurylys jumystary aiaqtaldy. Túrkistan oblysynyń ákimi Nuralhan Kósherov turǵyn úi kezeginde turǵan 40 otbasyna jańa páter kiltterin tapsyrdy.
"Memleket basshysy Qasym-Jomart Kemeluly turǵyndardy baspanamen qamtý boiynsha júieli jumys atqarýdy tapsyrdy. Óńirimizde jyl saiyn qurylys qarqyny artyp, kópqabatty úiler salynýda. Búgin qazyǵurttyq turǵyndar da qýanyshqa kenelip otyr. Barshańyzdy baspanalaryńyzben quttyqtaimyn!" – dedi Nuralhan Kósherov.
Bul úilerdiń qurylysy byltyr naýryz aiynda bastalyp, jyl sońynda aiaqtalǵan. Qurylysty "Ýrba Standart" JShS atqardy. 1 turǵyn úide 8 páterden bar. Onyń ishinde 1 bólmeli 2 páter (36,4 m²), 2 bólmeli 4 páter (59,4 jáne 52,2 m²) jáne 3 bólmeli 2 páterden (74,8 m²) bar.
Aita keteiik, Túrkistan oblysy qurylǵaly, iaǵni 2018-2024 jyldar aralyǵynda 14 myńnan asa otbasy turǵyn úimen qamtyldy. Onyń ishinde, kommýnaldyq turǵyn úimen 7 567 otbasy, al "7-20-25" jáne "Otbasy bank" baǵdarlamalary arqyly 6 594 otbasy ipotekalyq turǵyn úimen qamtamasyz etildi. Osy jerde dinamikaǵa qaraityn bolsaq, jylyna shamamen kommýnaldyq turǵyn úi qorynan jáne túrli ipotekalyq baǵdarlamalar arqyly 2 200-ge jýyq páter tabystalýda. Ótken jyldyń ózinde el 1174 kommýnaldyq úimen jáne 977 turǵyn ipotekalyq úimen qamtamasyz etildi. Bul jumystar júieli túrde jalǵasady.
