Túrkistan oblysy ákiminiń orynbasary Nurbol Turashbekov Keles aýdanynda kezekti shtab otyrysyn ótkizip, marokko shegirtkesine qarsy himiialyq óńdeý barysyn saralady,- dep habarlaidy Dalanews.kz
Kún tártibine sáikes, sektorlarǵa bekitilgen baqylaýshylar sóz alyp, baqylaý nátijesin baiandady. Jiynda mamandar taǵy 40 myń ga jer dárilenýi tiis ekenin aitty.
Arys qalasyna tiesili 6-7 sektorda dárileý jalǵasýda, 12-sektorǵa qosymsha 4 tehnika jetkizilgen. Qojatoǵai men Baitoǵaidyń arasyn zerdeleý barysynda kei aimaqtardaǵy shegirtkelerdiń ekonomikalyq ziiandy shegine jetpeitini anyqtaldy. Nátijesinde ushaqpen dárileý usynyldy. Arys qalasynyń ákimi Qaisar Mańqaraev qosymsha qajetti tehnikalar uiymdastyrylatynyn, himiialyq óńdeýdi merziminde aiaqtaýǵa kúsh salynatynyn málimdedi.
Sonymen qatar 29, 30, 34-sektorlarda jumys qarqynyn arttyrý jaiy qozǵaldy. Shardara aýdanymen shekaralas alqaptarǵa baqylaýdy kúsheitip, shegirtkelerdiń eresek kezeńine ótýine bailanysty dári mólsherin arttyrý máselesi kóterildi. 23-28 sektor aralyǵynda másele joq, anyqtaýshylar qaita baqylaýǵa kirisken. Keles aýdanynyń ákimi Jánibek Aǵybaev mamyr aiynyń alǵashqy on kúninde negizgi jumys aýqymy aiaqtalyp, aimaqtar tazalanatynyn jetkizdi.
"52-sektorda tehnikalar jumys atqarýda, búgin drondar aýa-raiynyń qolaisyzdyǵynan ushyrylmaǵan. Álimtaýǵa qajetti tehnika jetkizilgen 500 ga dárilense, alqaptardy tazalaýdy bastaimyz",- dedi jaýaptylar.
Saryaǵash aýdanynyń ákimi Arman Abdýllaev jumys barysynda týyndaǵan máselelerdi jeke qadaǵalaitynyn, tiisti sharalardyń merziminde atqarylýyn uiymdastyryp, aýdandarmen shektesetin alqaptarǵa qadaǵalýdy kúsheitetinin aitty. Aýdan basshysy himiialyq óńdeý josparǵa sáikes aiaqtalatynyn málimdedi.
Nurbol Turashbekov jumysy aiaqtalǵan sektor tehnikalaryn qaýipti aimaqtarǵa jumyldyrýdy tapsyryp, himiialyq preparattar men janar-jaǵarmai qoryn kúndelikti tekserýdi eskertti.
"Áriptester, jumystyń kóbi ketip, azy qaldy. Biraq, bosańsýǵa bolmaidy. Barlyq múmkindikti qoldanyp, asqan jaýapkershilikpen bul naýqandy abyroimen ótkerýimiz qajet. Búgin el bizge qarap otyr, al biz erteń jerge qaramaýdyń áreketin jasaiyq", - dedi oblys ákiminiń orynbasary.
