Túrkistan oblysynda agroónerkásip keshenin qoldaýǵa arnalǵan biýdjet qarajatyn zańsyz alý deregi boiynsha úkim shyqty, dep habarlaidy Dalanews.kz.
Oblys prokýratýrasy 2020–2023 jyldar aralyǵynda áreket etken qylmystyq shemany áshkerelep, jolyn kesti. Tergeý barysynda josyqsyz kásipkerler veterinariialyq baqylaý júiesindegi olqylyqtardy paidalanyp, memlekettik sýbsidiialardy zańsyz rásimdegeni anyqtaldy.
Atap aitqanda, keibir sharýa qojalyqtary úshinshi tulǵalarǵa áldeqashan satylyp ketken mal basy týraly málimetterdi «Aýyl sharýashylyǵy janýarlaryn sáikestendirý» aqparattyq júiesi arqyly kórsetip, sýbsidiia alǵan.
Mysaly, «Bereke» sharýa qojalyǵy 440 bas iri qara men 5 088 bas usaq malǵa zańsyz túrde sýbsidiia rásimdegen.
Memleketke keltirilgen jalpy shyǵyn 271 mln teńge boldy. Bul soma asa iri mólsherde dep tanyldy. Tergeýdi arnaiy prokýrorlar júrgizgen.
2025 jylǵy 1 qazanda sot is boiynsha bes adamǵa qatysty aiyptaý úkimin shyǵardy. Sottalýshylar 5 jyldan 6 jyl 6 aiǵa deiin bas bostandyǵynan aiyryldy. Sonymen qatar memleket paidasyna 140 mln teńge óndirildi.
Tekserý nátijesinde veterinariialyq qyzmet tarapynan tiisti baqylaýdyń bolmaǵany da anyqtalyp, bul jaǵdai qylmystyń jasalýyna yqpal etkeni atap ótildi.
Qazirgi ýaqytta prokýratýra 300 mln teńgeden astam somaǵa qatysty uqsas jymqyrý derekterin tergep jatyr. Bul ister jaqyn arada sotqa joldanbaq.
