Týystarynyń aıtýynsha, kúdiktiler ony esinen tanyp jatqan kezde de basynan tepkilegen. Keıin jigitti adam joq jerge tastap ketken. Jaqyndary ony eki saǵattan keıin ǵana tapqan.
Jábirlenýshiniń jaqyndarynyń aıtýynsha, kıkiljiń kúndiz kókpar kezinde bastalǵan. Keshke jigitti mektep mańyna "sóılesýge" shaqyrǵan, alaıda ol jerge barǵanda ony bir top adam kútip turǵan. Bir aptadaı jansaqtaý bóliminde jatqan jábirlenýshi qazir palataǵa aýystyrylǵan. Dese de áli tolyq sóıleı almaıdy jáne tergeýge naqty jaýap berýge qaýqarsyz. Onyń eki dosy da jaraqat alǵan.
Ata-anasynyń sózinshe, shabýyl jasaǵandardyń qolynda pyshaq, tapansha jáne kastet bolǵan. Olar ulynyń qaýipsizdigine alańdap otyr.
Túrkistan oblysy Polısıa departamenti málimetinshe, toptyq tóbeles deregi boıynsha eki kúdikti ustalǵan. Keıin olar úıqamaqqa jiberilgen. Tergeý jalǵasyp jatyr.
