Jańa bastamaǵa orai Túrkistan oblystyq jer qatynastary basqarmasynyń habarlaýynsha, ázirge 17 myń gektar jaiylym jer qaitaryldy. Sonyń biri Ordabasy aýdany Aqsary aýylynda iske asyp, halyqtyń talaby oryndaldy.
Túrkistan oblysyna jumys saparymen kelgen «AMANAT» partiiasy janynan qurylǵan «Jer amanaty» komissiiasynyń ókilderi Ordabasy aýdanyndaǵy jaiylym jer máselesiniń jai-kúiimen tanysty. «AMANAT» partiiasynyń hatshysy D.Káribek, QR Parlamenti Májilisiniń depýtattary J.Áshimjan, E.Sairov, QR Aýyl sharýashylyǵy ministrligi Jer resýrstaryn basqarý komitetiniń tóraǵasy – QR Jerdi paidalaný men qorǵaý jónindegi bas memlekettik inspektory M.Temirjanov, «AMANAT» partiiasy Túrkistan oblystyq filialynyń Atqarýshy hatshysy, fraktsiia jetekshisi B.Tájibaev Aqsary aýylynyń halqymen kezdesti.
Jaiylym alqabynda ótken Báidibek, Otyrar, Tólebi aýdandarynyń atqarýshy organdarynyń basshylary, sharýa qojalyqtarynyń jetekshileri de qatysty. Partiia janynan qurylǵan «Jer amanaty» komissiiasynyń múshesi, Májilis depýtaty E.Sairov kezdesýdiń maqsatyn aitty.
– Memleket basshysy jer máselesin ádiletti sheshýdi tapsyrdy. Búgingi tańda partiianyń eń negizgi printsipi de osy. Iaǵni, jer aýyldaǵy aǵaiynnyń enshisinde bolýy kerek. Qurylǵan komissiia músheleri ózimizdiń halyqqa jerdi qalai úlestiremiz degen degen jaýap izdep, búkil eldi mekendi aralaýdy bastady. Eger naqty ári negizi bar problema bolsa, ol jergilikti atqarýshy organ arqyly sheshile me álde Zańǵa ózgeris engizý kerek pe osyny anyqtaimyz. Keshendi qarastyrý úshin tek ózimiz emes Úkimettiń múshelerimen birge aralaimyz, – dedi Májilis depýtaty E.Sairov.
Tórtkól aýyl okrýgi, Aqsary aýylyna jaqyn ornalasqan jaiylym alqaptary 910 gektardy quraidy. Bul jer kólemi aýyl turǵyndarynyń sharýamen ainalysýyna azdyq etedi. Turǵyndardyń ýájin tyńdap, arnaiy komissiia arqyly sheshýge yqpal etý úshin kelgen komissiia ókilderi oryndy usynystar toptastyrylyp, Zańǵa ózgerister engizýge jumys júrgizetinderin jetkizdi.
Memleket basshysynyń tapsyrmasyn oryndaý úshin partiianyń aralasýymen ortaq paidalanýǵa beriletin jerdiń kólemi ulǵaitylatyny jaily jańalyq aýyl halqyn qýanyshqa keneltti. Sebebi kúnkórisi mal sharýashylyǵyna tikelei bailanysty aýyl halqynyń aitqan ýáji tez arada ońtaily sheshilip otyr.
Respýblikalyq komissiia ókilderi, depýtattar aitylǵan usynystardy nazarda ustap, turǵyndar talaby oryndy ekenin jetkizdi. Jerge qatysty zańbuzýshylyqtar kóshbasshy partiia tarapynan zerdelenip, naqty istermen tiisti sheshimder qabyldanady.
