QR Sý resýrstaryn basqarý júiesin damytýdyń 2024-2030 jyldarǵa arnalǵan tujyrymdamasyna sáikes, biyl Túrkistan oblysynda sý únemdeý tehnologiialaryn jańadan 22 myń gektarǵa ornalastyrý josparlanǵan, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búginde jospar 69% oryndaldy nemese sý únemdeý tehnologiialary 15 591 gektarǵa ornalastyrylǵan. Onyń ishinde, 9 563 gektarǵa tamshylatyp, 6 028 gektarǵa jańbyrlatyp sýarý tehnologiialary endirilgen. Atalǵan saladaǵy jumystar Túrkistan oblysynyń ákimi Darhan Satybaldynyń tóraǵalyǵymen ótken jinalysta kezekti ret talqylandy. Jaýaptylarǵa naqty tapsyrmalar berildi.
– Sý únemdeý tehnologiialaryn engizý josparyn oryndap qana qoimai, osy baǵyttaǵy jumystardy júieleý kerek. Ár aýdan, ár alqaptardaǵy egistikti birkelki etý mańyzdy. Máselen, bir aýmaqta túgel maqta egip, bir aýmaqty basqa da daqyl egýge mamandandyrý mańyzdy. Sonda ǵana sý únemdeý tehnologiiasy tolyq jemisin berip, túsim de, tabys ta artady. Odan keiin bir kókónisti nemese daqyldy egýge mamandanǵan aýdandarda ónimdi tereń óńdeý zaýyttaryn ashý mańyzdy.
Osylaisha, ónimdi ósirýden bastap, ony óńdeý, eksporttaý boiynsha tizbek qalyptasady. Jaýapty basqarma men aýdan, qala ákimderi sý únemdeý tehnologiiasyn engizýmen qatar egetin daqyldy anyqtaý, sapaly suryptaryn usyný, ónimdilikti arttyrý boiynsha súiemeldeý jumystaryn júrgizsin. Bizdiń maqsat – sýdy únemdeý arqyly sý tapshylyǵy máselesin sheshý jáne ónimdilikti arttyrý, – degen Darhan Satybaldy basshylarǵa jospardy ýaqtyly ári sapaly oryndaý jóninde tapsyrma berdi.
Túrkistan oblystyq aýyl sharýashylyǵy basqarmasynyń basshysy Nurbek Badyraqovtyń aitýynsha, jalpy oblysta sý únemdeý tehnologiialaryn qosymsha 8391 gektarǵa endirý jumystary júrgizilýde. Jyl qorytyndysymen 23 982 gektarǵa endirilip, jospar artyǵymen oryndalady dep kútilýde.
Biyl óńirde sý únemdeý tehnologiialaryn shyǵaratyn 3 jańa zaýyt ashylyp, jumysyn bastady. Olar – «TURAN SU» MKK-niń jylyna 9000 gektar jerdi tamshylatyp sýarý jobasy, «BNK Group LTD» JShS-niń jylyna 1000 dańa jańbyrlatyp sýarý tehnologiiasyn shyǵarý jobasy jáne osy kompaniianyń jylyna 14 myń gektarǵa tamshylatyp sýarý tehnologiiasyn shyǵarý jobasy. Úsh jobanyń jalpy quny – 12,5 mlrd. teńge, 85 jumys orny ashylǵan. Kásiporyndardyń jyldyq qýattylyǵy 73 myń gektardy qamtidy. Sonymen qatar keler jyly Otyrar men Maqtaaral aýdandarynda da osy baǵyttaǵy kásiporyndar ashylmaq. Oblysta sý únemdeý tehnologiialaryn endirý, ónimdilikti arttyrý baǵytyndaǵy jumystar jalǵasady.
