ق ر سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىنا سايكەس، بيىل تۇركىستان وبلىسىندا سۋ ۇنەمدەۋ تەحنولوگيالارىن جاڭادان 22 مىڭ گەكتارعا ورنالاستىرۋ جوسپارلانعان، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇگىندە جوسپار 69% ورىندالدى نەمەسە سۋ ۇنەمدەۋ تەحنولوگيالارى 15 591 گەكتارعا ورنالاستىرىلعان. ونىڭ ىشىندە، 9 563 گەكتارعا تامشىلاتىپ، 6 028 گەكتارعا جاڭبىرلاتىپ سۋارۋ تەحنولوگيالارى ەندىرىلگەن. اتالعان سالاداعى جۇمىستار تۇركىستان وبلىسىنىڭ اكىمى دارحان ساتىبالدىنىڭ توراعالىعىمەن وتكەن جينالىستا كەزەكتى رەت تالقىلاندى. جاۋاپتىلارعا ناقتى تاپسىرمالار بەرىلدى.
– سۋ ۇنەمدەۋ تەحنولوگيالارىن ەنگىزۋ جوسپارىن ورىنداپ قانا قويماي، وسى باعىتتاعى جۇمىستاردى جۇيەلەۋ كەرەك. ءار اۋدان، ءار القاپتارداعى ەگىستىكتى بىركەلكى ەتۋ ماڭىزدى. ماسەلەن، ءبىر اۋماقتا تۇگەل ماقتا ەگىپ، ءبىر اۋماقتى باسقا دا داقىل ەگۋگە مامانداندىرۋ ماڭىزدى. سوندا عانا سۋ ۇنەمدەۋ تەحنولوگياسى تولىق جەمىسىن بەرىپ، ءتۇسىم دە، تابىس تا ارتادى. ودان كەيىن ءبىر كوكونىستى نەمەسە داقىلدى ەگۋگە ماماندانعان اۋدانداردا ءونىمدى تەرەڭ وڭدەۋ زاۋىتتارىن اشۋ ماڭىزدى.
وسىلايشا، ءونىمدى وسىرۋدەن باستاپ، ونى وڭدەۋ، ەكسپورتتاۋ بويىنشا تىزبەك قالىپتاسادى. جاۋاپتى باسقارما مەن اۋدان، قالا اكىمدەرى سۋ ۇنەمدەۋ تەحنولوگياسىن ەنگىزۋمەن قاتار ەگەتىن داقىلدى انىقتاۋ، ساپالى سۇرىپتارىن ۇسىنۋ، ونىمدىلىكتى ارتتىرۋ بويىنشا سۇيەمەلدەۋ جۇمىستارىن جۇرگىزسىن. ءبىزدىڭ ماقسات – سۋدى ۇنەمدەۋ ارقىلى سۋ تاپشىلىعى ماسەلەسىن شەشۋ جانە ونىمدىلىكتى ارتتىرۋ، – دەگەن دارحان ساتىبالدى باسشىلارعا جوسپاردى ۋاقتىلى ءارى ساپالى ورىنداۋ جونىندە تاپسىرما بەردى.
تۇركىستان وبلىسى اكىمى سۋارمالى جەرى كوپ، ماقتا ەگەتىن جەتىساي، شاردارا، ماقتاارال اۋداندارى اكىمدەرىنە سۋ ۇنەمدەۋ تەحنولوگيالارىن ەنگىزۋ، ەگىستىكتى بىركەلكى ەتۋ، ءار ايماقتى ءبىر داقىلعا مامانداندىرۋ بويىنشا جوسپار جاساپ، ەكونوميكالىق تيىمدىلىگىن دالەلدەۋدى تاپسىردى. جوسپاردى ورىنداۋدى كەشىكتىرىپ جاتقان اۋدانداردىڭ اكىمدەرىنىڭ ەسەپتەرى تىڭدالىپ، جۇمىستى جانداندىرۋ جۇكتەلدى. سونىمەن بىرگە شارۋالارمەن تۇراقتى كەزدەسىپ، ءتۇسىندىرىپ، ولاردى ىرىلەندىرۋ كەرەكتىگىن جەتكىزدى.
تۇركىستان وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆتىڭ ايتۋىنشا، جالپى وبلىستا سۋ ۇنەمدەۋ تەحنولوگيالارىن قوسىمشا 8391 گەكتارعا ەندىرۋ جۇمىستارى جۇرگىزىلۋدە. جىل قورىتىندىسىمەن 23 982 گەكتارعا ەندىرىلىپ، جوسپار ارتىعىمەن ورىندالادى دەپ كۇتىلۋدە.
بيىل وڭىردە سۋ ۇنەمدەۋ تەحنولوگيالارىن شىعاراتىن 3 جاڭا زاۋىت اشىلىپ، جۇمىسىن باستادى. ولار – «TURAN SU» مكك-نىڭ جىلىنا 9000 گەكتار جەردى تامشىلاتىپ سۋارۋ جوباسى، «BNK Group LTD» ءجشس-نىڭ جىلىنا 1000 داڭا جاڭبىرلاتىپ سۋارۋ تەحنولوگياسىن شىعارۋ جوباسى جانە وسى كومپانيانىڭ جىلىنا 14 مىڭ گەكتارعا تامشىلاتىپ سۋارۋ تەحنولوگياسىن شىعارۋ جوباسى. ءۇش جوبانىڭ جالپى قۇنى – 12،5 ملرد. تەڭگە، 85 جۇمىس ورنى اشىلعان. كاسىپورىنداردىڭ جىلدىق قۋاتتىلىعى 73 مىڭ گەكتاردى قامتيدى. سونىمەن قاتار كەلەر جىلى وتىرار مەن ماقتاارال اۋداندارىندا دا وسى باعىتتاعى كاسىپورىندار اشىلماق. وبلىستا سۋ ۇنەمدەۋ تەحنولوگيالارىن ەندىرۋ، ونىمدىلىكتى ارتتىرۋ باعىتىنداعى جۇمىستار جالعاسادى.
