Qazaqstan ekonomikasy turaqty ósim kórsetip, investitsiialyq tartymdylyǵyn kúsheitip, shikizatqa táýeldilikti birtindep azaityp keledi, dep habarlaidy dalanews.kz.
Reuters agenttiginde jariialanǵan World Impact Media Organization (WIMO) analitikalyq esebinde álemdik ekonomikadaǵy turaqsyzdyqqa qaramastan Qazaqstannyń damý qarqyny salystyrmaly túrde turaqty ekeni atap ótilgen.
Esepke sáikes, 2025 jyldyń qorytyndysynda Qazaqstannyń jalpy ishki ónimi 6,5%-ǵa ósse, 2026 jyldyń alǵashqy bes aiynda ekonomika 3,7%-ǵa ulǵaiǵan. Naqty sektor 4%-ǵa, qyzmet kórsetý salasy 3,6%-ǵa ósken. Qurylys kólemi 13,4%-ǵa, óńdeý ónerkásibi 9%-ǵa, kólik jáne qoimalaý salasy 8,4%-ǵa, saýda 5,6%-ǵa artqan.
Sarapshylar investitsiialyq kórsetkishterge de erekshe nazar aýdarǵan. 2025 jyly Qazaqstanǵa tartylǵan tikelei sheteldik investitsiia kólemi $20,5 mlrd-qa jetip, bir jylda 14,4%-ǵa ósken. Sonymen qatar investitsiialar tek óndirýshi salaǵa ǵana emes, ekonomikanyń basqa baǵyttaryna da belsendi baǵyttala bastaǵan.
Esepte 2025 jyly greenfield formatyndaǵy investitsiialar kólemi $19 mlrd bolǵany, bul Ortalyq Aziiadaǵy osyndai investitsiialardyń shamamen 89%-yna teń ekeni kórsetilgen.
WIMO sarapshylarynyń pikirinshe, Qazaqstannyń ósimi búginde investitsiialar, óńdeý ónerkásibi jáne zamanaýi qyzmet kórsetý sektorlary esebinen qamtamasyz etilip keledi.
Sondai-aq materialda investitsiialyq saiasattyń 2030 jylǵa deiingi jańartylǵan tujyrymdamasy, Investitsiialyq shtabtyń qyzmeti, Ulttyq tsifrlyq investitsiialyq platforma, arnaiy ekonomikalyq jáne indýstriialyq aimaqtar, sondai-aq aǵylshyn quqyǵy qaǵidattaryna negizdelgen «Astana» halyqaralyq qarjy ortalyǵynyń múmkindikteri investitsiialyq ahýaldy jaqsartýǵa yqpal etkeni aitylǵan.
Sarapshylardyń baǵalaýynsha, bul sharalar investorlar úshin táýekelderdi tómendetip, rásimderdiń ashyqtyǵyn arttyryp, uzaq merzimdi investitsiialarǵa qolaily jaǵdai qalyptastyrýda. Sonymen birge Qazaqstan Singapýr, Qatar, Qytai jáne Saýd Arabiiasy siiaqty eldermen investitsiialardy ózara qorǵaý jónindegi kelisimder jelisin keńeitip keledi.
Esepte ekonomikany ártaraptandyrýǵa da erekshe mán berilgen. Atap aitqanda, óńdeý ónerkásibine, aýyl sharýashylyǵyna, azyq-túlik óndirisine, energetikaǵa, kólikke jáne tsifrlyq infraqurylymǵa salynatyn investitsiialar eldiń jańa ekonomikalyq damý modeliniń negizi retinde baǵalanǵan.
