«Jasyl aımaqtaǵy» Túrkistan oblysynda 128 egý pýnktinde koronavırýstyq ınfeksıaǵa qarsy vaksınasıa júrgizilýde. 100-den astam termokonteınermen qamtamasyz etilgen. QR Premer-Mınıstri Asqar Mamınniń tóraǵalyǵymen ótken Úkimet otyrysynda Túrkistan óńirindegi epıdemıologıalyq ahýaldy baıandaǵan oblys ákimi Ómirzaq Shókeev vaksınasıa sondaı-aq, jyljymaly vaksınasıalaý pýnktterinde júrgiziletinin atap ótti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

– Qazirgi tańda Túrkistan oblysynda 80 kóshpeli egý brıgadasy jumys isteıdi. Vaksınasıa júrgizý úshin daıarlanǵan 500-den asa mamanmen qamtamasyz etilgen. Túrkistan oblysy boıynsha jappaı vaksınasıalaý algorıtmi jasalǵan. Josparǵa sáıkes, 185 myń doza «Spýtnık-V» jáne 752 myń doza quraıtyn «QazVac» otandyq vaksınamen qamtamasyz etý josparlanyp otyr, – dedi Ómirzaq Shókeev.

Túrkistan oblysynda aqpan aıynan bastalǵan vaksınasıanyń 180 100 dozasy jetkizilip, birinshi komponent 176 myńnan astam adamǵa, ekinshi komponent 41 myń azamata salyndy. Jalpy 700 myńnan asa azamattan PTR test alynǵan.

Sońǵy táýlikte 30 adam KVI aýrýshańdyqpen tirkelip, onyń jartysynan astamynan aýrýdyń sımptomsyz túri anyqtalǵan. Koronavırýstyq ınfeksıanyń ár túrli senarıine baılanysty ınfeksıalyq tósek-oryn sanyn 5 610-ǵa deıin ulǵaıtýǵa múmkindik bar.

Jappaı vaksınasıalaý algorıtmine sáıkes, qala jáne aýdan turǵyndary vaksınany jergilikti emhanalardyń egý kabınetterinde arnaıy tizim jáne aldyn ala jazylý tásili boıynsha saldyrady. Ekpe sondaı-aq jyljymaly pýnktterde júrgiziledi. Turǵyndar aldyn ala Egov elektrondy júıesi arqyly tirkelip, erikti túrde vaksına jasata alady.