– قازىرگى تاڭدا تۇركىستان وبلىسىندا 80 كوشپەلى ەگۋ بريگاداسى جۇمىس ىستەيدى. ۆاكسيناسيا جۇرگىزۋ ءۇشىن دايارلانعان 500-دەن اسا مامانمەن قامتاماسىز ەتىلگەن. تۇركىستان وبلىسى بويىنشا جاپپاي ۆاكسيناسيالاۋ الگوريتمى جاسالعان. جوسپارعا سايكەس، 185 مىڭ دوزا «سپۋتنيك-V» جانە 752 مىڭ دوزا قۇرايتىن «QazVac» وتاندىق ۆاكسينامەن قامتاماسىز ەتۋ جوسپارلانىپ وتىر، – دەدى ءومىرزاق شوكەيەۆ.
تۇركىستان وبلىسىندا اقپان ايىنان باستالعان ۆاكسيناسيانىڭ 180 100 دوزاسى جەتكىزىلىپ، ءبىرىنشى كومپونەنت 176 مىڭنان استام ادامعا، ەكىنشى كومپونەنت 41 مىڭ ازاماتا سالىندى. جالپى 700 مىڭنان اسا ازاماتتان پتر تەست الىنعان.
سوڭعى تاۋلىكتە 30 ادام كۆي اۋرۋشاڭدىقپەن تىركەلىپ، ونىڭ جارتىسىنان استامىنان اۋرۋدىڭ سيمپتومسىز ءتۇرى انىقتالعان. كوروناۆيرۋستىق ينفەكسيانىڭ ءار ءتۇرلى سەناريىنە بايلانىستى ينفەكسيالىق توسەك-ورىن سانىن 5 610-عا دەيىن ۇلعايتۋعا مۇمكىندىك بار.
جاپپاي ۆاكسيناسيالاۋ الگوريتمىنە سايكەس، قالا جانە اۋدان تۇرعىندارى ۆاكسينانى جەرگىلىكتى ەمحانالاردىڭ ەگۋ كابينەتتەرىندە ارنايى ءتىزىم جانە الدىن الا جازىلۋ ءتاسىلى بويىنشا سالدىرادى. ەكپە سونداي-اق جىلجىمالى پۋنكتتەردە جۇرگىزىلەدى. تۇرعىندار الدىن الا Egov ەلەكتروندى جۇيەسى ارقىلى تىركەلىپ، ەرىكتى تۇردە ۆاكسينا جاساتا الادى.
