Túrkistan oblysynda 1000 gektarǵa jýyq jylyjai bar
Jýrnalister áýeli Qaplanbek aýyldyq okrýginde ornalasqan «Zandjanijad» sharýa qojalyǵyna aialdady. 2012 jyly iske qosylǵan qojalyqtyń qazir 3 gektarǵa jer telimi bar. Onyń ishinde jylyjai kólemi – 1,2 gektar. Jylyjaidyń óndiretin negizgi ónim túri – qyzanaq. Qojalyq ótken jyly 140 tonna ónim alǵan. Biyl ónim kólemin edáýir arttyra túspek. Qyzanaqty otandyq naryq pen Reseige jóneltip keledi. Qazirgi tańda 5 adam jumyspen qamtylǵan. Ortasha jalaqy – 55-60 myń teńge. Seriktestik iesi Zandjanijad Rýstemniń aitýynsha, jylyjaidyń qyzanaqtary tabiǵi taza ónim.
Keiin sapar aiasynda jýrnalister Jibek joly aýyldyq okrýginde ornalasqan «Izmir Saryaǵash» aýyl sharýashylyǵy keshenine bardy. 2017 jyly jumysyn bastaǵan keshende 20 gektar – baý, 4 gektar – jylyjai bar. Sondai-aq, 62 bas Aberdin-Angýs siyry bar. Onyń 57-si analyq bas, 5-ýi asyltuqymdy buqa. Keshende 60 myń teńge ortasha ailyqpen jalpy 5 adam jumyspen qamtylyp otyr. Aldaǵy ýaqytta iri qara mal sanyn 500-ge jetkizbek.
Aita keterligi, Túrkistan oblysy boiynsha 2018 jyldyń qorytyndysymen jylyjai kólemi 934,9 gektardy qurasa, qazirgi tańda oblysta 988,2 ga jylyjai bar. 2019 jyldyń qorytysyndysymen óńirde jylyjai kólemin 1114,9 gektarǵa jetkizý josparlanyp otyr. Al Saryaǵash aýdanynda ótken jyly 635,5 ga jylyjai bolsa, búgingi tańda 649,1 ga jylyjai bar.
