تۇركىستان وبلىسى سارىاعاش اۋدانىنا باسپا ءسوز تۋرى ۇيىمداستىرىلدى. ساپار اياسىندا ب ا ق قىزمەتكەرلەرى سارىاعاش اۋدانىنداعى «زاندجانيجاد» شارۋا قوجالىعى مەن «يزمير سارىاعاش» اۋىل شارۋاشىلىعى كەشەنىنىڭ جۇمىسىمەن تانىستى.

جۋرناليستەر اۋەلى قاپلانبەك اۋىلدىق وكرۋگىندە ورنالاسقان «زاندجانيجاد» شارۋا قوجالىعىنا ايالدادى. 2012 جىلى ىسكە قوسىلعان قوجالىقتىڭ ءقازىر 3 گەكتارعا جەر تەلىمى بار. ونىڭ ىشىندە جىلىجاي كولەمى – 1،2 گەكتار.  جىلىجايدىڭ وندىرەتىن نەگىزگى ءونىم ءتۇرى – قىزاناق. قوجالىق وتكەن جىلى 140 توننا ءونىم العان. بيىل ءونىم كولەمىن ەداۋىر ارتتىرا تۇسپەك. قىزاناقتى وتاندىق نارىق پەن رەسەيگە جونەلتىپ كەلەدى. قازىرگى تاڭدا 5 ادام جۇمىسپەن قامتىلعان. ورتاشا جالاقى – 55-60 مىڭ تەڭگە. سەرىكتەستىك يەسى زاندجانيجاد رۋستەمنىڭ ايتۋىنشا، جىلىجايدىڭ قىزاناقتارى تابيعي تازا ءونىم.

كەيىن ساپار اياسىندا جۋرناليستەر جىبەك جولى اۋىلدىق وكرۋگىندە ورنالاسقان «يزمير سارىاعاش» اۋىل شارۋاشىلىعى كەشەنىنە باردى. 2017 جىلى جۇمىسىن باستاعان كەشەندە 20 گەكتار –  باۋ، 4 گەكتار – جىلىجاي بار. سونداي-اق، 62 باس ابەردين-انگۋس سيىرى بار. ونىڭ 57ء-سى انالىق باس، 5ء-ۋى اسىلتۇقىمدى بۇقا. كەشەندە 60 مىڭ تەڭگە ورتاشا ايلىقپەن جالپى 5 ادام جۇمىسپەن قامتىلىپ وتىر. الداعى ۋاقىتتا ءىرى قارا مال سانىن 500-گە جەتكىزبەك.

ايتا كەتەرلىگى، تۇركىستان وبلىسى بويىنشا 2018 جىلدىڭ قورىتىندىسىمەن جىلىجاي كولەمى 934،9 گەكتاردى قۇراسا، قازىرگى تاڭدا وبلىستا 988،2 گا جىلىجاي بار.  2019 جىلدىڭ قورىتىسىندىسىمەن وڭىردە جىلىجاي كولەمىن 1114،9 گەكتارعا جەتكىزۋ جوسپارلانىپ وتىر.  ال سارىاعاش اۋدانىندا وتكەن جىلى 635،5 گا جىلىجاي بولسا، بۇگىنگى تاڭدا 649،1 گا جىلىجاي بار.