Túrkistan oblysynda sońǵy úsh jylda 1 million gektarǵa jýyq jer memleket menshigine qaitaryldy,- dep habarlaidy Dalanews.kz
Atap aitqanda, 2022 jyly 520 myń gektardan astam, 2023 jyly 330 myń gektardan astam, al 2024 jyldyń ózinde 70 myń gektardan astam aýyl sharýashylyǵy maqsatyndaǵy jer qaitarylǵan. Biyl jyl sońyna deiin qosymsha 110 myń gektar jer ýchaskesin memleketke qaitarý josparlanyp otyr. Búgingi kúnge onyń 60,1 myń gektary qaitaryldy. Bul jerler kezinde aýyl sharýashylyǵy maqsatynda jeke tulǵalarǵa berilgenimen, jyldar boiy paidalanylmaǵany anyqtalǵan.
Túrkistan oblysynda ortaq jaiylym jerlerdi memleket menshigine qaitarý jumystary qarqyndy júrgizilýde. Bul másele oblys ákiminiń apparatynda ótken aptalyq májiliste talqylandy. Atalǵan jumys Qazaqstan Respýblikasy Prezidenti Qasym-Jomart Toqaevtyń 2024 jylǵy 2 qyrkúiektegi Joldaýynda berilgen tapsyrmasyna sáikes júzege asyrylyp jatyr. Joldaýda paidalanylmai jatqan jerlerdi qaitaryp, olardy adal ári tiimdi paidalanatyn azamattarǵa berý mindeti qoiylǵan bolatyn. Osyǵan orai, jergilikti atqarýshy organdar men quzyrly organdar bos jatqan jerlerdi qaitaryp, olardy ádil bólý jumysyn jalǵastyrýda. Bul shara aýyl sharýashylyǵyn damytý men jer resýrstaryn tiimdi paidalaný maqsatynda qolǵa alynǵan.
Oblystyq jer qatynastary basqarmasynyń basshysy Erǵali Tilegenniń aitýynsha, óńirdiń jalpy jer qory – 11 mln 610,3 myń gektar. Qazirgi tańda paidalanylmai jatqan aýyl sharýashylyǵy maqsatyndaǵy jerlerdi jáne Qazaqstan Respýblikasynyń zańnamasyn buza otyryp paidalanylyp jatqan jer telimderin memleket menshigine qaitarý maqsatynda oblys ákiminiń ókimimen vedomstvoaralyq jumys toby qurylǵan.
Túrkistan oblysy boiynsha aýyl sharýashylyǵy maqsatyndaǵy jerlerdi memleketke qaitarý eki baǵytta júzege asyrylyp jatyr. Birinshi baǵyt – Aýyl sharýashylyǵy ministrligi bekitken jospar aiasynda júrgizilse, ekinshi baǵyt jumys toby anyqtaǵan ortaq jaiylymdardy qaitarý jospary boiynsha iske asýda.
Jiyn barysynda Túrkistan oblysynyń ákimi Nuralhan Kósherov jaiylym jerlerdi memleketke qaitarý jumystaryn kúsheitýdi tapsyrdy. Ol jaýapty organdarǵa júieli monitoring júrgizip, jyldyq jospardyń tolyq oryndalýyn qamtamasyz etýdi mindettedi.
– Memleket basshysy ortaq jaiylymdardy el igiligine qaitarý jóninde naqty tapsyrma berdi. Aýdan, qala ákimderi, jaýapty basqarmalar men departamentter osy baǵyttaǵy jumysty kúsheitsin. Maqsatsyz paidalanylyp jatqan jerlerdi qaitarý isi júieli júrgizilýi kerek. Kosmomonitoring nátijelerin eskerip, tereń taldaý jasaǵan jón. Monitoring, zerdeleý jumystary toqtamaý kerek jáne jyldyq jospardyń tolyq oryndalýy tiis, – dedi Nuralhan Kósherov.
Qazirgi tańda Jer resýrstaryn basqarý departamenti tarapynan 403 jer paidalanýshyǵa tiesili 124,3 myń gektar jaiylym jerge qatysty qujattar qaralyp, nusqamalar joldanýda. Sonymen qatar aýdan jáne qala ákimdikteri bekitken josparlar aýyldyq okrýgter kesindisinde ázirlenip, bekitilgen. Qaitarylǵan jaiylym jerlerdiń karta-syzbalary daiyndaldy.
