Elimizde jumys kúshi jetispeıtin soltústik óńirlerge halyqty qonystandyrý jumystary Túrkistan oblysynda 2015 jyldan beri júrgizilýde. Búgingi tańǵa deıin óńirden «Qýatty óńirler – el damýynyń draıveri» jobasy aıasynda jalpy 9 812 múshesi bar 2 556 otbasy qonys aýdarǵan, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Túrkistan oblysynda ótken jyldarmen salystyrǵanda soltústikke kóshýge nıet bildirgen otbasylardyń qatary 3 esege deıin ulǵaıǵan.

Memlekettik baǵdarlamanyń tıimdiligin túsindirý úshin Pavlodar oblysynan Túrkistan oblysyna 3 jumysshy top keldi. Delegasıa ókilderi soltústik óńirlerge qonys aýdarý máselesi boıynsha aqpan aıynyń 14-18 kúnderi aralyǵynda ashyq esik kúnin ótkizedi.

Kezdesýde memlekettik qoldaý sharttary jáne bos jumys oryndary boıynsha túsindirme jumystary júrgizilmek.

Aıta keteıik, ońtústikten soltústikke qonys aýdarǵan azamattarǵa qoldaý kóp. Máselen, kóship kelgen jaǵdaıda ár adamǵa 70 AEK (214 410 teńge) kóleminde birrettik qarjy usynylady. Turǵyn úı máselesin sheshý úshin árbir januıaǵa otbasynyń quramyna baılanysty 15-ten 30 AEK-ke deıingi (45 945 teńgeden - 91 890 teńgege deıin) mólsherde sýbsıdıalar qarastyrylǵan.