6 qazan – búkil Qazaqstan boıynsha Referendým ótedi. Osyǵan oraı, Qazaqstan Respýblıkasy Ortalyq referendým komısıasynyń hatshysy Muhtar Erman Túrkistan oblysyna issaparmen kelip, Oqýshylar saraıyndaǵy referendým ýchaskesiniń jumysymen tanysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Odan bólek, is-sapar barysynda Túrkistan qalasyndaǵy «Uly Dala eli» ortalyǵynda «Respýblıkalyq referendýmdy daıyndaý men ótkizý máseleleri» taqyrybynda  keńes ótkizip, referendýmǵa daıyndyq jóninde tıisti memlekettik organdardyń basshylarynyń esebin tyndady. Keńeste Túrkistan oblysy ákimi apparatynyń basshysy Erkeǵalı Álimqulov moderatorlyq etti. 

Jıyn barysynda Túrkistan oblysy boıynsha Aımaqtyq referendým komısıasynyń tóraǵasy Ańsar Óserbaev óńirdegi daıyndyq jumystary týraly baıandady.

– Búginde referendým ýchaskeleri referendým ótkizýge daıyn. Ýchaskeler qajetti qural-jabdyqtarmen, materıaldyq-tehnıkalyq jaǵynan tolyq qamtamasyz etilgen. Saılaýshylarǵa shaqyrý bıletteri, esepten shyǵarý talondary ázirlengen. Múgedektigi bar azamattardyń daýys berýine yńǵaıly bolý úshin kabınalary jańartyldy, saılaýshylardy habardar etý maqsatyndaǵy qaǵazdar, respýblıkalyq referendým zańy jazylǵan paraqtar, saılaý boıynsha erejeler jazylǵan paraqshalar taratylýda, – dedi Ańsar Óserbaev.

Atap óteıik, respýblıkalyq referendýmǵa oblys boıynsha jalpy sany 6 351 komısıa múshesi tartylǵan. Komısıa músheleriniń 90 paıyzy túrli deńgeıdegi saılaý naýqandaryn ótkizýde tájirıbesi bar. Sondaı-aq oblysta jalpy 945 saılaý ýchaskesi bar. Búgingi tańda óńirdegi barlyq aýdan, qalalarda «senim telefondary», oblysta «109-biryńǵaı» call-ortalyq jumys isteýde. Oblys ákimdiginiń resmı ınternet resýrstarynda «Óz referendým ýchaskeńizdi tabyńyz» onlaın servısi iske qosyldy. Respýblıkalyq referendým qarsańynda referendým komısıalary tolyq oqytyldy.