6 قازان – بٷكٸل قازاقستان بويىنشا رەفەرەندۋم ٶتەدٸ. وسىعان وراي, قازاقستان رەسپۋبليكاسى ورتالىق رەفەرەندۋم كوميسسيياسىنىڭ حاتشىسى مۇحتار ەرمان تٷركٸستان وبلىسىنا ٸسساپارمەن كەلٸپ, وقۋشىلار سارايىنداعى رەفەرەندۋم ۋچاسكەسٸنٸڭ جۇمىسىمەن تانىستى, – دەپ حابارلايدى Dalanews.kz تٷركٸستان وبلىسى ەكٸمٸنٸڭ باسپاسٶز قىزمەتٸنە سٸلتەمە جاساپ.
ودان بٶلەك, ٸس-ساپار بارىسىندا تٷركٸستان قالاسىنداعى «ۇلى دالا ەلٸ» ورتالىعىندا «رەسپۋبليكالىق رەفەرەندۋمدى دايىنداۋ مەن ٶتكٸزۋ مەسەلەلەرٸ» تاقىرىبىندا كەڭەس ٶتكٸزٸپ, رەفەرەندۋمعا دايىندىق جٶنٸندە تيٸستٸ مەملەكەتتٸك ورگانداردىڭ باسشىلارىنىڭ ەسەبٸن تىندادى. كەڭەستە تٷركٸستان وبلىسى ەكٸمٸ اپپاراتىنىڭ باسشىسى ەركەعالي ەلٸمقۇلوۆ مودەراتورلىق ەتتٸ.
جيىن بارىسىندا تٷركٸستان وبلىسى بويىنشا ايماقتىق رەفەرەندۋم كوميسسيياسىنىڭ تٶراعاسى اڭسار ٶسەرباەۆ ٶڭٸردەگٸ دايىندىق جۇمىستارى تۋرالى باياندادى.
– بٷگٸندە رەفەرەندۋم ۋچاسكەلەرٸ رەفەرەندۋم ٶتكٸزۋگە دايىن. ۋچاسكەلەر قاجەتتٸ قۇرال-جابدىقتارمەن, ماتەريالدىق-تەحنيكالىق جاعىنان تولىق قامتاماسىز ەتٸلگەن. سايلاۋشىلارعا شاقىرۋ بيلەتتەرٸ, ەسەپتەن شىعارۋ تالوندارى ەزٸرلەنگەن. مٷگەدەكتٸگٸ بار ازاماتتاردىڭ داۋىس بەرۋٸنە ىڭعايلى بولۋ ٷشٸن كابينالارى جاڭارتىلدى, سايلاۋشىلاردى حاباردار ەتۋ ماقساتىنداعى قاعازدار, رەسپۋبليكالىق رەفەرەندۋم زاڭى جازىلعان پاراقتار, سايلاۋ بويىنشا ەرەجەلەر جازىلعان پاراقشالار تاراتىلۋدا, – دەدٸ اڭسار ٶسەرباەۆ.
