– Elbasymyz balamaly energıa kózderin paıdalaný arqyly jasyl ekonomıkany engizýdi únemi aıtyp keledi. Mine, búginde oblys ortalyǵy Túrkistan qalasy osyndaı jańashyldyqqa bet burǵaly otyr. Al, jumystardy Halyqaralyq jasyl tehnologıalar jáne ınvestısıalyq jobalar ortalyǵymen birlese otyryp júzege asyramyz, – dedi Janseıit Qanseıituly.
Búgingi kúni ǵylymı jetistikterdiń arqasynda barlyq ekologıalyq máselelerdi is júzinde ekonomıkalyq turǵyda sheshýge bolady. Sondyqtan da «jasyl» tehnologıalar termıni paıda boldy.
Óz kezeginde «Halyqaralyq jasyl tehnologıalar jáne ınvestısıalyq jobalar ortalyǵy» komersıalyq emes aksıonerlik qoǵamynyń basshysy Rapıl Joshybaev, ortalyq «jasyl ekonomıka» obektileriniń aqparattyq júıesin qalyptastyrý boıynsha jobanyń tujyrymdamasyn ázirlegenin jetkizdi.
– Bul memlekettik baǵdarlamasy aıasynda iske asyrylatyn jáne qazaqstandyq kásiporyndardaǵy jasyl tehnologıanyń engizilýin, sondaı-aq damýyn onlaın rejımde baqylaýǵa múmkindik beretin suranystaǵy ónim. Odan bólek, jańasha júıe kún sáýlesi, jel, sý, bıomassa jáne qaldyqtardan balamaly energıa óndirý kartalaryn qamtıdy, – dedi R. Joshybaev.
Memorandýmda aımaqtyń áleýetin paıdalana otyryp, Túrkistan oblysynda sheteldik ınvestorlarmen birlesken jobalardy júege asyrý kózdelgen. Sonymen qatar, qujatta qosymsha energıa óndirý úshin, kún jáne jel elektr stansıalarynyń qurylysyna ınvestısıalar tartý, energıany jáne aýdandyq gazben jabdyqtaýda resýrsty únemdeıtin tehnologıalardy qoldaný, aýyl sharýashylyǵy salasyndaǵy bıotehnologıalardy damytý, taza sýmen qamtamasyz etý joldary qaralǵan.
Qazirgi tańda Ortalyq «Bir beldeý bir jol» baǵdarlamasy aıasynda «Astana EKSPO-2017» Halyqaralyq mamandandyrylǵan kórmesiniń murasynyń is júzindegi jalǵasy bolyp tabylatyn jahandyq «Silk road Super Grid» jobasyn júzege asyrýdy usynýda. Bul Qazaqstandaǵy jasyl ekonomıkanyń ilgerileýine súbeli úles qosatyny sózsiz.
Túrkistan oblysy ákiminiń baspasóz qyzmeti
