Túrkistan oblysy Politsiia departamentiniń májilis zalynda esirtkiniń zańsyz ainalymyna qatysty máselelerdi talqylaý maqsatynda Úilestirý keńesi ótti. Oǵan Túrkistan oblysynyń ákimi Darhan Satybaldy, Politsiia departamentiniń basshysy Murat Qabdenov, oblys prokýrory Murat Tileýberdiev, UQK-niń Túrkistan oblysy boiynsha departamentiniń basshysy Bolat Qalmurzaev, SJQIQD bastyǵy Murat Tóleýbaev jáne basqa da quzyrly organ basshylary qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kezdesý barysynda esirtkige qarsy is-qimyl, aldyn alý máseleleri qaraldy. Esirtki, psihotroptyq zattardyń zańsyz ainalymyna qatysty qylmystar men atqarylǵan jumystar talqylandy. Organ basshylary tarapynan baiandamalar oqylyp, jumysty shiratý joldary aityldy.
Prokoratýra tarapynan esirtkige qarsy kúresti kúsheitý boiynsha tiisti eskertpeler men usynystar berildi. Oblystyq PD bastyǵynyń orynbasary Qurmanbek Sahov politsiianyń jumysy nátijesinde jyl basynan beri esirtkiniń zańsyz ainalymyna qatysty 650-den astam derek tirkelip, 330 keliden astam esirtki tárkilengenin jáne esirtki qylmystaryn boldyrmaý maqsatynda 48 000-ǵa jýyq oqýshy men stýdenttiń qatysýymen profilaktikalyq is-sharalar ótkizilgenin atap ótti.
Jalpy Túrkistan oblysynyń politsiiasymen áleýmettik jelilerge monitoring júrgizý barysynda telegram kanalda anyqtalǵan 34 internet dúkenniń qyzmeti toqtatyldy. Al kiberqadaǵalaý baǵdarlamasy arqyly 104 sait buǵattalǵan.
Keńeste Túrkistan oblysy ákiminiń orynbasary Beisenbai Tájibaev ákimdik tarapynan esirtkiniń taralýyn shekteý jáne aldyn alý baǵytyndaǵy ideologiialyq jáne túsindirý jumystary, óńirde atqarylǵan is-sharalar týraly baiandady. Jastar arasynda túrli formattaǵy jiyndar, is-sharalar ótkizilgenin, esirtkige qarsy aqparattyq jumys turaqty júrip jatqanyn málimdedi. Oblystyq densaýlyq saqtaý, Bilim basqarmalarynyń basshylyǵy tarapynan da tiisti málimetter berilip, usynystar qaraldy.
Úilestirý keńesiniń músheleri jiyn barysynda nashaqorlyqtyń aldyn alý baǵytyndaǵy jumystardy, jastar men oqýshylar arasynda tárbie jumystaryn jáne dáristerdi kúsheitip, birlese jumys atqarýǵa ýaǵdalasty.
