تۇركىستان وبلىسى پوليسيا دەپارتامەنتىنىڭ ءماجىلىس زالىندا ەسىرتكىنىڭ زاڭسىز اينالىمىنا قاتىستى ماسەلەلەردى تالقىلاۋ ماقساتىندا ۇيلەستىرۋ كەڭەسى ءوتتى. وعان تۇركىستان وبلىسىنىڭ اكىمى دارحان ساتىبالدى، پوليسيا دەپارتامەنتىنىڭ باسشىسى مۇرات قابدەنوۆ، وبلىس پروكۋرورى مۇرات تىلەۋبەردييەۆ، ۇقك-نىڭ تۇركىستان وبلىسى بويىنشا دەپارتامەنتىنىڭ باسشىسى بولات قالمۇرزايەۆ، ءسجقىقد باستىعى مۇرات تولەۋبايەۆ جانە باسقا دا قۇزىرلى ورگان باسشىلارى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا ەسىرتكىگە قارسى ءىس-قيمىل، الدىن الۋ ماسەلەلەرى قارالدى. ەسىرتكى، پسيحوتروپتىق زاتتاردىڭ زاڭسىز اينالىمىنا قاتىستى قىلمىستار مەن اتقارىلعان جۇمىستار تالقىلاندى. ورگان باسشىلارى تاراپىنان باياندامالار وقىلىپ، جۇمىستى شيراتۋ جولدارى ايتىلدى.
پروكوراتۋرا تاراپىنان ەسىرتكىگە قارسى كۇرەستى كۇشەيتۋ بويىنشا ءتيىستى ەسكەرتپەلەر مەن ۇسىنىستار بەرىلدى. وبلىستىق پد باستىعىنىڭ ورىنباسارى قۇرمانبەك ساحوۆ پوليسيانىڭ جۇمىسى ناتيجەسىندە جىل باسىنان بەرى ەسىرتكىنىڭ زاڭسىز اينالىمىنا قاتىستى 650-دەن استام دەرەك تىركەلىپ، 330 كەلىدەن استام ەسىرتكى تاركىلەنگەنىن جانە ەسىرتكى قىلمىستارىن بولدىرماۋ ماقساتىندا 48 000-عا جۋىق وقۋشى مەن ستۋدەنتتىڭ قاتىسۋىمەن پروفيلاكتيكالىق ءىس-شارالار وتكىزىلگەنىن اتاپ ءوتتى.
جالپى تۇركىستان وبلىسىنىڭ پوليسياسىمەن الەۋمەتتىك جەلىلەرگە مونيتورينگ جۇرگىزۋ بارىسىندا تەلەگرام كانالدا انىقتالعان 34 ينتەرنەت دۇكەننىڭ قىزمەتى توقتاتىلدى. ال كيبەرقاداعالاۋ باعدارلاماسى ارقىلى 104 سايت بۇعاتتالعان.
كەڭەستە تۇركىستان وبلىسى اكىمىنىڭ ورىنباسارى بەيسەنباي تاجىبايەۆ اكىمدىك تاراپىنان ەسىرتكىنىڭ تارالۋىن شەكتەۋ جانە الدىن الۋ باعىتىنداعى يدەولوگيالىق جانە ءتۇسىندىرۋ جۇمىستارى، وڭىردە اتقارىلعان ءىس-شارالار تۋرالى باياندادى. جاستار اراسىندا ءتۇرلى فورماتتاعى جيىندار، ءىس-شارالار وتكىزىلگەنىن، ەسىرتكىگە قارسى اقپاراتتىق جۇمىس تۇراقتى ءجۇرىپ جاتقانىن مالىمدەدى. وبلىستىق دەنساۋلىق ساقتاۋ، ءبىلىم باسقارمالارىنىڭ باسشىلىعى تاراپىنان دا ءتيىستى مالىمەتتەر بەرىلىپ، ۇسىنىستار قارالدى.
ۇيلەستىرۋ كەڭەسىنىڭ مۇشەلەرى جيىن بارىسىندا ناشاقورلىقتىڭ الدىن الۋ باعىتىنداعى جۇمىستاردى، جاستار مەن وقۋشىلار اراسىندا تاربيە جۇمىستارىن جانە دارىستەردى كۇشەيتىپ، بىرلەسە جۇمىس اتقارۋعا ۋاعدالاستى.
