Jıynǵa Túrkistan oblysynyń kásipkerlik jáne ındýstrıaldy-ınnovasıalyq damý basqarmasy jáne kedendik deklarasıany baqylaý bóliminiń basshylary, sondaı-aq, «Kazakh Export» eksporttyq saqtandyrý kompanıasy» AQ, «Atameken» RKP» AQ, «Aýyl sharýashylyǵyn qarjylaı qoldaý qory» aksıonerlik qoǵamynyń jáne «Agrarlyq nesıe korporasıasy» aksıonerlik qoǵamynyń Túrkistan aýdany boıynsha aımaqtyq fılıaldary jáne «Ońtústik» AIO ókilderi qatysyp, óz taraptarynan esporttaýshy kompanıalarǵa kórsetetin qyzmetteri týraly málimdedi.
Elimizdiń ekonomıkasyn damytýda otandyq ónimderdiń eksportqa shyǵýy joǵary mańyzǵa ıe ekendigin tilge tıek etken Erbol Qýanyshuly kásipkerlerdiń eksporttyq áleýetin kóterý boıynsha arnaıy jumys toby qurylǵandyǵyn jetkizdi.
– Qazirgi tańda kásipkerlerdiń kórshi elder naryǵyna kirýine belgili tosqaýyldar bar. Olar óndiristik kóleminiń jetkiliksizdigi, tasymaldaý máseleleriniń jolǵa qoıylmaǵandyǵy nemese kedendik kedergiler. Mine, osyndaı máselelerdi sheshýde qoldaý kórsetip, kompanıanyń eksportqa shyǵýyna deıin súıemeldeý maqsatynda biz arnaıy jumys tobyn qurdyq. Jumys toby «Ońtústik» aımaqtyq ınvestısıalyq ortalyǵynyń mamandarynan quralǵan, – dedi oblys ákiminiń orynbasary.
Búgingi tańda Túrkistan oblysy boıynsha 50 áleýetti eksporttaýshy kompanıa bar. Olar taýarlaryn Eýroodaq elderine, Qytaı jáne Ortalyq Azıa elderine eksportqa shyǵarýda. Alaıda, eksport kólemin arttyryp, jalpy shet el naryǵyna shyǵýda kedergiler joq emes. Kezdesý barysynda kásipkerler kedendik rásimdeý prosedýrasyn jeńildetý, óndiris kólemin arttyrýǵa qarjylaı kómek kórsetý jáne eksporttyq kelisim-sharttardy saqtandyrý boıynsha qoldaý qajettigin aıtty.
Atalǵan máseleler tıisti sala mamandaryna júktelip, oblystyq ákimdik tarapynan baqylaýǵa alynatyn boldy. Jıyn sońynda kásipkerler barlyq damý ınstıtýttarynyń basshylarymen kezdesip, qajetti aqparattarmen qamtamasyz etildi.
Túrkistan oblysynyń baspasóz qyzmeti
