Túrkistan oblysy bazarlarynda kitaphana ashý jobasy bastaldy
Túrkistan oblysynda halyq kóp shoǵyrlanǵan bazarlarda kitaphana ashý jobasy qolǵa alyndy. Búgin sol jobaǵa sai alǵash ret Túrkistan qalasyndaǵy «Qýanysh» saýda ortalyǵynda «Farab» kitaphanasynyń pýnkti ashyldy. Jańa rýhaniiat ordasynyń ashylýyna jergilikti ziialy qaýym ókilderi, kásipkerler jáne oblys ákiminiń orynbasary Beisen Tájibaev qatysyp, kóptiń qýanyshymen bólisti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Halyq kóp shoǵyrlanǵan orynda bilim berý jáne mádeni platforma qurý maqsatynda «Bazardaǵy kitaphana» ideiasy týyndap, búgin iske asyrylýda. Bul jobany oblys ákimi Darhan Satybaldy qoldap, qoǵam mádenietin damytý baǵytynda júieli sharalar uiymdastyrýdy tapsyryp otyr.
Ózderińizge belgili, óńirde turǵyndardyń basym kópshiligi saýda núkteleri arqyly kásibin dóńgeletip júr.
Qarapaiym halyqtyń da jii keletin orny – bazar. Sondyqtan da osyndaǵy kásipkerlerdiń kitap oqyp, iskerlik turǵydan izdenýine qoldaý bildirip, mádeni ortany keńeitý maqsatynda tyń jobany bastadyq.
Qaladaǵy eń úlken «Qýanysh» saýda ortalyǵynda 1700-den astam kásipker jumys isteidi. Kúnine orta eseppen 20 myńnan astam adam keledi. Búgingi ashylyp jatqan kitaphana bir kúnde 70 adamǵa deiin qyzmet kórsetedi, aiyna orta eseppen 1500 adam qamtidy dep josparlanýda.
Mundai tyń jobany ári qarai da aýdan, qalalardaǵy ortalyq bazarlarda jalǵastyratyn bolamyz. Qoǵamdy kitap oqýǵa qyzyqtyratyn jańa jobalardyń jandanýy oqyrmannyń kóbeiýine tikelei áser etedi. Bastamamyzǵa qoldaý bildirgen bazar ielerine alǵysymdy bildirgim keledi. Búgingi kitaphana pýnkti de oqyrman igiligi úshin qyzmet etedi dep senemin, – dedi oblys ákiminiń orynbasary.
Munda túrli baǵyttaǵy kórkem ádebietter men kásipti nyǵaitýǵa baǵyttalǵan jáne jiger beretin álemdik bestsellerden quralǵan 3 myńǵa jýyq kitap qory bar. Týyndylar kásipkerlerge óz biznesin damytýǵa, tulǵa retinde qalyptasýyna úles qosyp qana qoimai, jańa ári kreativti ideialardyń týýyna múmkindik bermek.
Halyqtyń suranysyna sai kitap sóreleri turaqty túrde jańartylyp otyrady. Sonymen qatar arnaiy qatarlar nemese shkaftar ornatylyp, sol jerde azamattar oqyǵan kitaptaryn syiǵa qaldyrady nemese basqa kitaptarmen almastyryp oqi alady.
Túrkistan oblysy ákimdiginiń tapsyrmasyna sáikes ashylyp otyrǵan kitaphana qyzmeti bilimge qoljetimdilikti, mádeni qundylyqtarmen almasýdy kózdeidi. Sonymen birge azamattarǵa merzimdi basylymdar men kórkem ádebietterdi, balalarǵa arnalǵan kitaptardy usynady. Oqýǵa jaily orta jasap, oqyrmanmen tyǵyz bailanys ornatyp, kelýshilerdiń ýaqytyn tiimdi ótkizýine yqpal etedi.
Búginde óńirde jalpy 39 bazar jumys isteidi. Onda 7 myńnan astam kásipker saýda-sattyqpen ainalysýda. Joba aiasynda aýdan, qalalardaǵy úlken saýda ortalyqtarynda da kitaphanalar ashylyp, bastama jalǵasyn tabatyn bolady.
Aita keteiik, Túrkistan oblysy aýmaǵynda 398 kitaphana, 6 millionǵa jýyq kitap qory bar. Ótken jyly «Ashyq ákimdiktegi ashyq kitaphana» jobasy qolǵa alynyp, nátijesinde oblystyń jáne aýdan, qalalardaǵy ákimdik ǵimarattarynda, áleýmettik nysandarda kitaphana buryshtary ashylyp, kitapqa degen qoljetimdilik artty.
Atap aitsaq, qazirgi tańda oblys boiynsha ákimshilik ǵimaratynan 15 jáne basqa da nysandarda 8 kitaphananyń jyljymaly pýnkti ashylyp, oqyrman igiligi úshin qyzmet etip jatyr.
