– حالىق كوپ شوعىرلانعان ورىندا ءبىلىم بەرۋ جانە مادەني پلاتفورما قۇرۋ ماقساتىندا «بازارداعى كىتاپحانا» يدەياسى تۋىنداپ، بۇگىن ىسكە اسىرىلۋدا. بۇل جوبانى وبلىس اكىمى دارحان ساتىبالدى قولداپ، قوعام مادەنيەتىن دامىتۋ باعىتىندا جۇيەلى شارالار ۇيىمداستىرۋدى تاپسىرىپ وتىر.
وزدەرىڭىزگە بەلگىلى، وڭىردە تۇرعىنداردىڭ باسىم كوپشىلىگى ساۋدا نۇكتەلەرى ارقىلى كاسىبىن دوڭگەلەتىپ ءجۇر.
قاراپايىم حالىقتىڭ دا ءجيى كەلەتىن ورنى – بازار. سوندىقتان دا وسىنداعى كاسىپكەرلەردىڭ كىتاپ وقىپ، ىسكەرلىك تۇرعىدان ىزدەنۋىنە قولداۋ ءبىلدىرىپ، مادەني ورتانى كەڭەيتۋ ماقساتىندا تىڭ جوبانى باستادىق.
قالاداعى ەڭ ۇلكەن «قۋانىش» ساۋدا ورتالىعىندا 1700-دەن استام كاسىپكەر جۇمىس ىستەيدى. كۇنىنە ورتا ەسەپپەن 20 مىڭنان استام ادام كەلەدى. بۇگىنگى اشىلىپ جاتقان كىتاپحانا ءبىر كۇندە 70 ادامعا دەيىن قىزمەت كورسەتەدى، ايىنا ورتا ەسەپپەن 1500 ادام قامتيدى دەپ جوسپارلانۋدا.
مۇنداي تىڭ جوبانى ءارى قاراي دا اۋدان، قالالارداعى ورتالىق بازارلاردا جالعاستىراتىن بولامىز. قوعامدى كىتاپ وقۋعا قىزىقتىراتىن جاڭا جوبالاردىڭ جاندانۋى وقىرماننىڭ كوبەيۋىنە تىكەلەي اسەر ەتەدى. باستامامىزعا قولداۋ بىلدىرگەن بازار يەلەرىنە العىسىمدى بىلدىرگىم كەلەدى. بۇگىنگى كىتاپحانا پۋنكتى دە وقىرمان يگىلىگى ءۇشىن قىزمەت ەتەدى دەپ سەنەمىن، – دەدى وبلىس اكىمىنىڭ ورىنباسارى.
مۇندا ءتۇرلى باعىتتاعى كوركەم ادەبيەتتەر مەن كاسىپتى نىعايتۋعا باعىتتالعان جانە جىگەر بەرەتىن الەمدىك بەستسەللەردەن قۇرالعان 3 مىڭعا جۋىق كىتاپ قورى بار. تۋىندىلار كاسىپكەرلەرگە ءوز بيزنەسىن دامىتۋعا، تۇلعا رەتىندە قالىپتاسۋىنا ۇلەس قوسىپ قانا قويماي، جاڭا ءارى كرەاتيۆتى يدەيالاردىڭ تۋۋىنا مۇمكىندىك بەرمەك.
حالىقتىڭ سۇرانىسىنا ساي كىتاپ سورەلەرى تۇراقتى تۇردە جاڭارتىلىپ وتىرادى. سونىمەن قاتار ارنايى قاتارلار نەمەسە شكافتار ورناتىلىپ، سول جەردە ازاماتتار وقىعان كىتاپتارىن سىيعا قالدىرادى نەمەسە باسقا كىتاپتارمەن الماستىرىپ وقي الادى.
تۇركىستان وبلىسى اكىمدىگىنىڭ تاپسىرماسىنا سايكەس اشىلىپ وتىرعان كىتاپحانا قىزمەتى بىلىمگە قولجەتىمدىلىكتى، مادەني قۇندىلىقتارمەن الماسۋدى كوزدەيدى. سونىمەن بىرگە ازاماتتارعا مەرزىمدى باسىلىمدار مەن كوركەم ادەبيەتتەردى، بالالارعا ارنالعان كىتاپتاردى ۇسىنادى. وقۋعا جايلى ورتا جاساپ، وقىرمانمەن تىعىز بايلانىس ورناتىپ، كەلۋشىلەردىڭ ۋاقىتىن ءتيىمدى وتكىزۋىنە ىقپال ەتەدى.
بۇگىندە وڭىردە جالپى 39 بازار جۇمىس ىستەيدى. وندا 7 مىڭنان استام كاسىپكەر ساۋدا-ساتتىقپەن اينالىسۋدا. جوبا اياسىندا اۋدان، قالالارداعى ۇلكەن ساۋدا ورتالىقتارىندا دا كىتاپحانالار اشىلىپ، باستاما جالعاسىن تاباتىن بولادى.
ايتا كەتەيىك، تۇركىستان وبلىسى اۋماعىندا 398 كىتاپحانا، 6 ميلليونعا جۋىق كىتاپ قورى بار. وتكەن جىلى «اشىق اكىمدىكتەگى اشىق كىتاپحانا» جوباسى قولعا الىنىپ، ناتيجەسىندە وبلىستىڭ جانە اۋدان، قالالارداعى اكىمدىك عيماراتتارىندا، الەۋمەتتىك نىسانداردا كىتاپحانا بۇرىشتارى اشىلىپ، كىتاپقا دەگەن قولجەتىمدىلىك ارتتى.
اتاپ ايتساق، قازىرگى تاڭدا وبلىس بويىنشا اكىمشىلىك عيماراتىنان 15 جانە باسقا دا نىسانداردا 8 كىتاپحانانىڭ جىلجىمالى پۋنكتى اشىلىپ، وقىرمان يگىلىگى ءۇشىن قىزمەت ەتىپ جاتىر.
