Biyl 1 naýryzdan bastap Túrkistan oblysynda kóktemgi áskerge shaqyrý naýqany bastaldy. Shara maýsym aiynyń sońyna deiin jalǵaspaq. Naýqan barysynda 18-27 jas aralyǵyndaǵy er azamattar QR Prezidentiniń Jarlyǵyna sáikes merzimdi áskeri qyzmetke shaqyrylady. Bul týraly Túrkistan oblysy Qorǵanys isteri Departamenti bastyǵynyń orynbasary Jandos Kúlderbaev brifingte málimdedi, dep habarlaidy Dalanews.kz
«Áskerge azamattardy shaqyrý – bul Qarýly Kúshterdi, basqa da áskerler men áskeri qurylymdardy jasaqtaýǵa baǵyttalǵan mańyzdy shara. Biyl kóktemde Túrkistan oblysynan 2500-den azamat shaqyrylyp, olar búkil el aýmaǵynda Otan aldyndaǵy boryshyn óteýge attanady. Jospar boiynsha kúzgi naýqan kezinde de 2500 azamat áskerge shaqyrylmaq. Bul kórsetkish boiynsha Túrkistan oblysy elimizde kósh bastap tur»,- dedi spiker.
Meditsinalyq jáne shaqyrý komissiialary oblystyń 14 aýdanynda óz jumysyn jalǵastyrýda. Al jergilikti áskeri basqarý organdary áskerge shaqyrylýshylarǵa habarlaý jumystaryn uiymdastyrady. Eske sala keteiik, habarlaý tek dástúrli shaqyrý qaǵazdary arqyly ǵana emes, sonymen qatar, mobildi telefondarǵa SMS-habarlamalar jiberý arqyly da júrgiziledi.
Sondai-aq, áskeri qyzmetten jaltarý zań boiynsha aýyr saldary bar. Dálirek aitsaq, shaqyrylýshy negizsiz kelmese, oǵan aiyppul salynady, al meditsinalyq tekserýden ótýden bas tartsa – eskertý nemese aiyppul qarastyrylǵan. Al eger zańdy sebepsiz áskeri qyzmetten jaltarsa, qylmystyq jaýapkershilikke tartylady. Bul aiyppul tóleýge, túzeý nemese qoǵamdyq jumystarǵa, tipti bas bostandyǵynan aiyrylýǵa deiin alyp kelýi múmkin.
QR Qorǵanys ministrligi áskerge qyzmet etýge qyzyǵýshylyqty arttyrý úshin birqatar sharalar qabyldaýda. Olardyń arasynda «Nesielik demalys» baǵdarlamasy, bul qyzmetke shaqyrylǵan azamattarǵa qyzmet merziminde nesieler men qaryzdardy tóleýden bosatý múmkindigin beredi. Sonymen qatar, merzimdi áskeri qyzmetti abyroimen atqaryp shyqqan azamattarǵa «Srochnik 2.0» jobasy aiasynda ýniversitetterge qabyldaý emtihansyz túsý múmkindigin usynady.
