Túrkistan oblysy ákiminiń birinshi orynbasary Zulpyhar Joldasov oblys turǵyndarymen qoǵamdyq qabyldaý ótkizdi. Onda ózi jetekshilik etetin salalar boıynsha turǵyndardyń usynystary men muń-muqtajdaryn tyńdady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Qabyldaýǵa 11 azamat kelip, teń jartysy baspana kezeginiń jyljymaıtynyn aıtyp shaǵymdandy. Turǵyn úı kezegi elektrondy túrde júretindigi jáne zańsyz jyljýy múmkin emestigi túsindirildi. Sondaı-aq, jaldamaly páterde turatyndarǵa baspananyń 50 paıyzyn sýbsıdıalaý jaıy da usynyldy.

Túrkistandyq turǵyn ıpoteka arqyly alǵan úıiniń qazirgi tańdaǵy jaı-kúıine shaǵymdandy. Osy rette jaýapty sala ókilderi tarapynan merdiger mekeme jóndeý jumystaryn bastaǵany aıtyldy. Kezek rettiligimen turǵyndardyń úılerine jóndeý jumystary júrgizilmek.

Al Saryaǵashtyq turǵyn jeriniń aktisin 10 jyldan beri ala almaı júrgenin aıtyp keldi. Mundaı 300-ge jýyq azamat bar. Mán-jaıdy anyqtaı kele bul jerlerdiń zańsyz satylǵany belgili boldy. Jaýapty sala ókilderine máseleni sheshý tapsyryldy.

Aıta keteıik, memleket tarapynan muqtaj otbasylarǵa turǵyn úı jaldaý aqysynyń 50 paıyzyn ótep berý qarastyrylǵan. Ol úshin "Otbasy bankine" ótinim joldaý qajet.