تۇركىستان وبلىسى اكىمىنىڭ ءبىرىنشى ورىنباسارى تۇرعىنداردىڭ وتىنىشتەرىن تىڭدادى

جاربول كەنت ۇلى 25 ءساۋ. 2024 11:16 1981

تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ وبلىس تۇرعىندارىمەن قوعامدىق قابىلداۋ وتكىزدى. وندا ءوزى جەتەكشىلىك ەتەتىن سالالار بويىنشا تۇرعىنداردىڭ ۇسىنىستارى مەن مۇڭ-مۇقتاجدارىن تىڭدادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

قابىلداۋعا 11 ازامات كەلىپ، تەڭ جارتىسى باسپانا كەزەگىنىڭ جىلجىمايتىنىن ايتىپ شاعىمداندى. تۇرعىن ءۇي كەزەگى ەلەكتروندى تۇردە جۇرەتىندىگى جانە زاڭسىز جىلجۋى مۇمكىن ەمەستىگى ءتۇسىندىرىلدى. سونداي-اق، جالدامالى پاتەردە تۇراتىندارعا باسپانانىڭ 50 پايىزىن سۋبسيديالاۋ جايى دا ۇسىنىلدى.

تۇركىستاندىق تۇرعىن يپوتەكا ارقىلى العان ءۇيىنىڭ قازىرگى تاڭداعى جاي-كۇيىنە شاعىمداندى. وسى رەتتە جاۋاپتى سالا وكىلدەرى تاراپىنان مەردىگەر مەكەمە جوندەۋ جۇمىستارىن باستاعانى ايتىلدى. كەزەك رەتتىلىگىمەن تۇرعىنداردىڭ ۇيلەرىنە جوندەۋ جۇمىستارى جۇرگىزىلمەك.

ال سارىاعاشتىق تۇرعىن جەرىنىڭ اكتىسىن 10 جىلدان بەرى الا الماي جۇرگەنىن ايتىپ كەلدى. مۇنداي 300-گە جۋىق ازامات بار. ءمان-جايدى انىقتاي كەلە بۇل جەرلەردىڭ زاڭسىز ساتىلعانى بەلگىلى بولدى. جاۋاپتى سالا وكىلدەرىنە ماسەلەنى شەشۋ تاپسىرىلدى.

ايتا كەتەيىك، مەملەكەت تاراپىنان مۇقتاج وتباسىلارعا تۇرعىن ءۇي جالداۋ اقىسىنىڭ 50 پايىزىن وتەپ بەرۋ قاراستىرىلعان. ول ءۇشىن "وتباسى بانكىنە" ءوتىنىم جولداۋ قاجەت.


ۇسىنىلعان
سوڭعى جاڭالىقتار