Aldymen kópshilikke áleýmettik ideialar jáne jobalar jármeńkesi usynyldy. Úzdik jobalar tanystyryldy.
Mańyzdy jiynda Túrkistan oblysynyń ákimi Darhan Satybaldy 40-tan asa úkimettik emes uiymnyń basyn biriktirgen «Túrkistan oblysynyń Azamattyq aliansy» zańdy tulǵalar qaýymdastyǵyn 20 jyldyq merekesimen quttyqtady. Qoǵamdaǵy ózekti máselelerdi sheshýde úkimettik emes uiymdardyń belsendiligin arttyryp, jumysyn jandandyrý kerektigin aitty.
– Túrkistan tórindegi bul is-sharanyń azamattyq qoǵamdy damytýǵa yqpaly mol dep esepteimin. Óńirdegi azamattyq qoǵam institýttary otanshyldyqtyń jarqyn úlgisin kórsetip keledi. Oblystaǵy úkimettik emes uiymdardyń sany 2018 jyly 400-dei bolsa, biyl 611-ge jetti.
Memleket basshysy Qasym-Jomart Kemeluly azamattyq qoǵam institýttaryna, sonyń ishinde úkimettik emes uiymdardyń qyzmetterine asa zor mańyz berip otyr. Nátijesinde jyl saiyn úkimettik emes uiymdarǵa memlekettik qoldaý qarjysynyń kólemi arta túsýde.
Sonymen birge oblystaǵy birqatar úkimettik emes uiymdar sheteldik qorlardyń granttaryn jeńip, túrli baǵyttarda jumystaryn júrgizýde. Osy jiyndy paidalanyp, úkimettik emes uiymdardy qoǵamdaǵy asa ózekti problemalardy birge sheshýge shaqyramyn.
Oblysymyzdyń negizgi draiverleri – aýyl sharýashylyǵy, týrizm jáne kásipkerlik. Jumyssyzdyq – bizdiń óńirimizdiń eń basty problemasy. Bul salalardy damytýǵa da qoǵamdyq uiymdardyń qairatkerligi qajet. Sondyqtan qoǵamdaǵy osy problemalardy sheshý baǵytynda úkimettik emes uiymdarynan tyń jobalar kútemiz. Oǵan qoldaý kórsetiledi, – degen Darhan Satybaldy azamattyq sektordyń belsendi ókilderin marapattady.
Jiynda QR Mádeniet jáne aqparat vitse-ministriniń mindetin atqarýshy Daniiar Qadyrov, «Qazaqstannyń Azamattyq Aliansy» zańdy tulǵalar birlestiginiń prezidenti Baný Nurǵazieva jáne ózge de azamattar mazmundy baiandamalar jasap, áleýmettik ideialar men jobalar baiqaýynyń jeńimpazdaryn marapattady.
Jiyndy «Túrkistan oblysynyń Azamattyq Aliansy» zańdy tulǵalar qaýymdastyǵy nysanyndaǵy birlestiktiń tóraiymy Inara Namazbaeva júrgizip otyrdy. Túrkistan oblystyq politsiia departamentiniń áielderdi zorlyq-zombylyqtan qorǵaý tobynyń jetekshisi, politsiia podpolkovnigi Janar Qalabaeva ana men bala quqyǵyn qorǵaý, zorlyq-zombylyqtyń aldyn alý baǵytynda atqarylyp jatqan jumystardy baiandady. Forýmnyń kún tártibinde otbasylyq jáne genderlik saiasat máseleleri qaraldy. Usynystar berilip, josparlar jasaldy.
Túrkistan oblysynda 2 millionnan astam halyq bar. Onyń 49,2 paiyzy (1 070 484) – áielder. Qazir oblystaǵy 6411 memlekettik qyzmetshiniń 1590-y nemese 24,4 paiyzyn názikjandylar quraidy. Onyń ishinde 256-sy nemese 16 paiyzy basshylyq laýazymdardy atqaryp otyr. Oblys kóleminde 155 myńnan astam kásipker bolsa, onyń 48 myńǵa jýyǵy – hanymdar.
Úkimettik emes uiymdar bilim, balalar quqyǵyn qorǵaý baǵytynda jemisti eńbek etýde. 2023 jyldyń sońyna deiin «Besterek» jobasy aiasynda mektepterdiń 1200 pedogog-psihology bilimderin arttyrady. Maqsat – oqýshylarǵa jańa tásilde psihologiialyq kómek kórsetý.
Sonymen birge balalar men jasóspirimder arasynda sýitsid pen zorlyq-zombylyqtyń aldyn alý baǵytynda belsendi joba iske asýda. Jiyn sońynda Astana qalasynda ótetin «Ádiletti Qazaqstan: bárimiz jáne árqaisymyz úshin» taqyrybyndaǵy Qazaqstannyń HI Azamattyq forýmyna Túrkistan oblysy atynan qatysatyn delegattar sailandy.
