Jiynda oblys ákimi Darhan Satybaldy atalǵan salany damytý, jańa jumys oryndaryn ashý asa mańyzdy ekenin jetkizdi.
– Oblystyń ózindik tabysyn arttyrý úshin jańa jumys oryndaryn ashý kerek. Bul rette maqta klasterin damytýdyń mańyzy zor. Osy salada iri fabrika, zaýyt ashamyn deitin azamattarǵa qoldaý kórsetýge daiynbyz.
Sonymen qatar maqta ósirýde sý únemdeý tehnologiiasyn meilinshe jetildirý qajet. Jalpy maqta sharýashylyǵy úlken izdenister men zertteýlerdi talap etedi. Oblys ákimdigi tarapynan maqta klasterin damytýǵa jaǵdai jasalady. Osy baǵytta úlken josparlarymyz bar, – dedi Darhan Satybaldy.
Oblystyq aýyl sharýashylyǵy basqarmasy basshysynyń orynbasary E.Jánibekov oblysta maqta-toqyma klasterin qurý baǵytyndaǵy josparǵa toqtaldy. Oblys ákiminiń tapsyrmasymen osy baǵytta arnaiy tujyrymdamanyń jobasy ázirlengen. Maqsaty – maqta sharýashylyǵyn ártaraptandyrý, maqta-toqyma kesheni kásiporyndaryn damytý jáne 2027 jylǵa deiin toqyma ónerkásibiniń básekege qabiletti ónimin alý.
Shitti maqta ósirýden bastap, joǵary sapaly ónim shyǵaratyn 75 kásiporyn ashý, 9 klaster qurý kózdelgen. 41 myńnan astam jumys ornyn ashyp, maqta talshyǵyn qaita óńdeý kólemin 100 paiyzǵa jetkizý mejelenip otyr. Mata, mai, kiim jáne maqtadan ózge de ónimder shyǵarý maqsaty da qoiylǵan.
