تۇركىستان. ماقتا-توقىما سالاسىندا 75 كاسىپورىن اشۋ جوسپارى تالقىلاندى

Dalanews 31 مام. 2023 06:46 590

تۇركىستان وبلىسىندا ماقتا كلاستەرىن قۇرۋ جوباسى ازىرلەندى. وسى جوبانى تالقىلاۋ جانە ساراپشىلار، ماماندار پىكىرىن ءبىلۋ ماقساتىندا ءماجىلىس ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

جيىندا وبلىس اكىمى دارحان ساتىبالدى اتالعان سالانى دامىتۋ، جاڭا جۇمىس ورىندارىن اشۋ اسا ماڭىزدى ەكەنىن جەتكىزدى.

– وبلىستىڭ وزىندىك تابىسىن ارتتىرۋ ءۇشىن جاڭا جۇمىس ورىندارىن اشۋ كەرەك. بۇل رەتتە ماقتا كلاستەرىن دامىتۋدىڭ ماڭىزى زور. وسى سالادا ءىرى فابريكا، زاۋىت اشامىن دەيتىن ازاماتتارعا قولداۋ كورسەتۋگە دايىنبىز.

سونىمەن قاتار ماقتا وسىرۋدە سۋ ۇنەمدەۋ تەحنولوگياسىن مەيلىنشە جەتىلدىرۋ قاجەت. جالپى ماقتا شارۋاشىلىعى ۇلكەن ىزدەنىستەر مەن زەرتتەۋلەردى تالاپ ەتەدى. وبلىس اكىمدىگى تاراپىنان ماقتا كلاستەرىن دامىتۋعا جاعداي جاسالادى. وسى باعىتتا ۇلكەن جوسپارلارىمىز بار، – دەدى دارحان ساتىبالدى.


جيىندا وڭىردەگى ماقتا شارۋاشىلىعىنىڭ ءىرى كاسىپكەرلەرى، قارجىلىق ۇيىم وكىلدەرى، وبلىستىق ءماسليحات دەپۋتاتتارى مەن عالىمدار ءوز ۇسىنىستارى مەن پىكىرلەرىن ايتتى. ەڭ الدىمەن ماقتا سۇرپىنىڭ ساپاسىن جاقسارتۋ كەرەكتىگىن جەتكىزدى.

وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ە.جانىبەكوۆ وبلىستا ماقتا-توقىما كلاستەرىن قۇرۋ باعىتىنداعى جوسپارعا توقتالدى. وبلىس اكىمىنىڭ تاپسىرماسىمەن وسى باعىتتا ارنايى تۇجىرىمدامانىڭ جوباسى ازىرلەنگەن. ماقساتى – ماقتا شارۋاشىلىعىن ءارتاراپتاندىرۋ، ماقتا-توقىما كەشەنى كاسىپورىندارىن دامىتۋ جانە 2027 جىلعا دەيىن توقىما ونەركاسىبىنىڭ باسەكەگە قابىلەتتى ءونىمىن الۋ.

ءشيتتى ماقتا وسىرۋدەن باستاپ، جوعارى ساپالى ءونىم شىعاراتىن 75 كاسىپورىن اشۋ، 9 كلاستەر قۇرۋ كوزدەلگەن. 41 مىڭنان استام جۇمىس ورنىن اشىپ، ماقتا تالشىعىن قايتا وڭدەۋ كولەمىن 100 پايىزعا جەتكىزۋ مەجەلەنىپ وتىر. ماتا، ماي، كيىم جانە ماقتادان وزگە دە ونىمدەر شىعارۋ ماقساتى دا قويىلعان.

ۇسىنىلعان
سوڭعى جاڭالىقتار