Frantsiia eli men Qazaqstannyń ózge de óńirlerinen ákelingen 33 júirik at «Kerýen sarai» kópfýnktsionaldy týristik kesheninde 3D-grafikasyn qoldana otyryp usynylatyn teatrlandyrylǵan qoiylymǵa qatysady.
Frantsiianyń jylqy ósirý zaýyty Qambar ata tólin ósirýde dástúrli tásildermen qosa innovatsiialyq tehnologiialardy qoldanady. Sáigúlikterdi salt júriske úiretedi.
Oblys basshysy Ómirzaq Shókeev Túrkistan qalasyndaǵy qurylys alańdaryn aralap, atqarylǵan jumystardy baqylady. Týrizmniń negizgi oshaǵyna ainalatyn «Kerýen sarai» kesheninde bolǵan oblys ákimi ondaǵy jumys barysyn pysyqtady. Kórermenderge arnalǵan alyp arenany aralap, kógaldandyrý jumystarynyń barysymen tanysty. Munda kúrdeli qurylys aiaqtalǵan.
Aimaq basshysy mádeni-rýhani ortalyqta ornalasqan ǵylymi-ámbebap kitaphanada júrgizilip jatqan qurylys jumystarymen tanysty. Jalpy aýmaǵy 8500 sharshy metrge jetetin úsh qabatty ǵimaratta 400 oryndyq oqý zaly, 250 myń kitap qory bolady. Oblys basshysynyń tapsyrmasymen kitaphananyń ishki qabyrǵalary áinekke aýystyrylyp, zamanaýi tehnikamen jabdyqtalýda. Jihazdar ornatylýda.
Ómirzaq Estaiuly «Tuńǵysh Prezident saiabaǵynda» boldy. Islam baǵy negizinde boi kótergen demalys aýmaǵy 40 gektarǵa jýyq. Saiabaqtaǵy jasandy kólge sý keldi. Ol úshin sý uńǵymasy men rezervýar salyndy. 7 myńǵa jýyq aǵash otyrǵyzylǵan baqta jaiaý júrginshiler joldary salynyp, kishi sáýlettik músinder ornatylǵan. Saiabaqtyń bas qaqpasy mármármen qaptalǵan.
