– Barshańyzdy Respýblika kúnimen shyn júrekten quttyqtaimyn! Biz, Memleket basshysy Qasym-Jomart Kemeluly Toqaevtyń Ulytaýda ótken quryltaidaǵy sheshiminen keiin ekinshi jyly Respýblika kúni ulttyq merekesin jańa mazmunda atap ótýdemiz. 1990-shy jyly 25 qazanda Qazaqstannyń memlekettik egemendigi týraly deklaratsiia qabyldandy.
Egemendik deklaratsiiasy – qasterli Táýelsizdigimizdiń negizi. Bul kún –eldigimizdi nyǵaityp, yntymaǵymyzdy arttyratyn aishyqty mereke.
Bul – ótken ǵasyrda azattyq jolynda sheiit bolǵan Alash arystarynyń jankeshti eńbeginiń jemisi. Táýelsizdik ońailyqpen kelgen joq. Sondyqtan azattyqtyń, osy beibit kúnniń qadirin bilý asa mańyzdy.
Memleket basshysynyń Ádiletti Qazaqstandy qurý bastamasymen elimizde tyń bastamalar qolǵa alynyp, ekonomikalyq, saiasi reformalar júzege asýda. Túrkistan oblysy quryldy, Túrkistan ortalyq retinde qalyptasty. Bes jylda óńirde aýqymdy jumys atqaryldy. Aýyldardyń infraqurylymyn jaqsartý, gaz, turǵyn úi, bilim salalaryndaǵy ózekti máseleleri bar qurylys nysandaryn aiaqtaý baǵytynda naqty sheshimder qabyldanyp, jumystar atqaryldy. Óńirdiń ekonomikalyq, investitsiialyq jáne týristik áleýeti arta tústi.
Biz birligimizdi saqtap, ult múddesi jolynda eńbek etýimiz kerek. Ulttyq merekemiz – birligimizdiń negizgi temirqazyǵy! Otbasylaryńyzǵa amandyq, baq-bereke tileimin. Táýelsizdigimiz tuǵyrly bolsyn! – degen Darhan Satybaldy memleketti, óńirdi damytýǵa úles qosqan bir top azamatqa memlekettik marapattardy tapsyrdy.
Qoǵamnyń túrli salasynda eńbegimen daralanǵan azamattarǵa «Parasat», «Qurmet», III dárejeli «Eńbek Dańqy» ordenderi, sonymen qatar «Eren eńbegi úshin», «Erligi úshin», «Shapaǵat» medaldary men Qurmet Gramotalary tabystaldy. Eńbek adamdaryna qurmet kórsetildi.
Merekelik kesh maǵynaly ári mazmundy kontserttik baǵdarlamaǵa ulasty. Sharada elimizge tanymal óner juldyzdary men «Kongress holl» mekemesine jańadan qabyldanǵan ónerpazdardyń «Jana Lep!» dep at berilgen jastar tolqyny óner kórsetti. Teatrlandrylǵan qoiylymdar usynylyp, qazaqtyń tarihynan syr shertildi. Qazaqtyń ulttyq aspaptarynan kúi kúmbirlep, otanshyldyq baǵytyndaǵy ánder shyrqaldy.
Túrkistan jurtshylyǵy Respýblika kúnin tolaiym tabystarmen qarsy aldy. Bes jylda jalpy óńirlik ónim kólemi 2 esege artty. Biylǵy jarty jyldyń qorytyndysymen jalpy óńirlik ónim kólemi 1,5 trln teńgeni qurady. Aýyl sharýashylyǵynda 803 mlrd teńgeniń ónimi óndirilip, ósim 2 paiyzdy qurady.
Et eksporty boiynsha oblysy kósh basynda tur. Qarqyndy baý 5 myń gektarǵa endirilip, jylyjailar 1640 gektarǵa jetti. Memleket basshysynyń tapsyrmasymen «Aýyl amanaty» jobasy iske asyrylýda. Búgingi tańda 12 mlrd teńgege 2 070 joba qarjylandyryldy.
Biyl ónerkásip kólemi 681 mlrd teńgeni qurady (4,7 paiyzǵa artty). Jyl basynan 669 myń sharshy metr turǵyn úi paidalanýǵa berilip, 7%-ǵa artty. Bilim berý salasynda mektep tapshylyǵyn sheshý jáne 5 apatty, 6 úsh aýysymdy mektepter sanyn qysqartý maqsatynda 2023-2025 jyldar aralyǵynda 96 nysan salynady. Qurylysy keshikken 17 mekteptiń qarjylandyrý máselesi sheshilip, jumystar bastaldy.
Oblys aýmaǵynda biraz jyldan beri sheshimin tappai kele jatqan máseleler bar edi. Atap aitqanda, qurylysy aiaqtalǵanymen, 33 eldi meken túrli sebeptermen tabiǵi gazǵa qosylmai qalǵan bolatyn. Búginde 16 eldi meken tabiǵi gazben qamtamasyz etildi. Qalǵan 17 eldi mekendi jyl sońyna deiin gazǵa qosý josparlanǵan. Oblystyń ekonomikalyq damýy qarqyndy ári josparlary aýqymdy.
