Memleket basshysynyń tapsyrmalaryn iske asyrý aiasynda Premer-ministrdiń birinshi orynbasary Nurlybek Nálibaev Qaraǵandy oblysyna jumys saparymen baryp, óńirdegi iri indýstriialyq jáne energetikalyq jobalardyń damýymen tanysty. Sapar barysynda ónerkásip kásiporyndaryn jańǵyrtýǵa, aldaǵy jylytý maýsymyna daiyndyqqa, jylý energetikasyn damytý men gazdandyrý máselelerine basa nazar aýdaryldy, dep habarlaidy dalanews.kz.
Temirtaýda Premer-ministrdiń birinshi orynbasary Qarmet metallýrgiialyq kombinatynda bolyp, óndiristik protsestermen jáne kásiporyndy jańǵyrtý baǵdarlamasymen tanysty.
"Domna peshterin tabiǵi gazǵa kóshirý mazýt qoldanýdan tolyq bas tartýǵa múmkindik berdi. Bul agregattardyń turaqty jumysyn qamtamasyz etip, qorshaǵan ortaǵa áserdi azaitty", – dedi Qarmet Corporation basqarma tóraǵasy Petr Trýshin.
Sondai-aq Nurlybek Nálibaevqa kombinattaǵy jańa óndiristik nysandar qurylysynyń barysy baiandaldy.
2025 jyldyń qorytyndysy boiynsha kásiporyn 3,8 million tonna bolat óndirgen. «5–9–5» strategiiasy aiasynda kompaniia 2028 jylǵa qarai bolat óndirisin 5 million tonnaǵa, kómir óndirisin 9 million tonnaǵa jáne temir keni kontsentratyn 5 million tonnaǵa deiin arttyrýdy josparlap otyr.
Sapardyń jeke bir bóligi 2026–2027 jyldardaǵy jylytý maýsymyna daiyndyq pen Temirtaý jáne Qaraǵandy qalalarynyń energetikalyq infraqurylymyn jańǵyrtý máselelerine arnaldy.
"Aldaǵy jylytý maýsymynda eshqandai másele bolmaýy kerek. 1 qyrkúiekke deiin barlyq nysan daiyndyq pasporttaryn alýy tiis. Jylytý maýsymy kezinde eshqandai irkiliske jol berýge bolmaidy", – dep atap ótti Nurlybek Nálibaev.
Vitse-premer sondai-aq Qaraǵandy JEO-3-tegi jóndeý jumystarynyń barysymen jáne stantsiiany keńeitý jobasymen tanysty. Jańa energoblok elektr qýatyn 140 MVt-qa, al jylý qýatyn 180 Gkal/saǵatqa arttyrýǵa múmkindik beredi.
"JEO-3-ti keńeitý – óńirdegi eń iri infraqurylymdyq jobalardyń biri. Joba aiaqtalǵannan keiin qosymsha qýat rezervi qurylyp, 400-den astam turǵyn úi men áleýmettik nysan jylýmen qamtamasyz etiledi", – dedi «Qaraǵandy Energotsentr» JShS bas direktory Fliýr Garipov.
Sapar barysynda Qaraǵandyny gazdandyrý máseleleri de qaraldy. Biyl jobanyń birinshi kezeńin aiaqtaý josparlanyp otyr.
"Birinshi kezeń aiasynda 10 myńnan astam abonentke gaz jetkiziledi. Osy jumystar aiaqtalǵan soń Prishahtinsk, Maiqudyq jáne Sortirovka aýdandaryn qamtityn ekinshi kezeńge kóshemiz", – dep baiandady Qaraǵandy ákimi Meiram Qojýhov.
Óńirdiń indýstriialyq damýy aiasynda Nurlybek Nálibaev óńdeý ónerkásibindegi birqatar kásiporynǵa bardy.
TEMPO Qazaqstan zaýytynda oǵan bolattan tik tigisti qubyr shyǵaratyn jańa óndiristik jeli tanystyryldy. Diametri 630 mm bolatyn qubyrlardy arnaiy kúidirý jáne shynyqtyrý tehnologiiasy ónimdi −60-tan +60 gradýsqa deiingi temperatýrada paidalanýǵa múmkindik beredi. Qazaqstanda mundai óndiristiń balamasy joq.
Silk Road Electronics kásipornynda vitse-premer turmystyq tehnika óndirisimen jáne lokalizatsiia baǵdarlamasymen tanysty. Búginde zaýytta kir jýǵysh mashinalar, shańsorǵyshtar, boilerler, asúi plitalary, teledidarlar men sorǵyshtar shyǵarylady.
"Qazir kásiporynda shamamen 300 adam jumys isteidi. Kásiporyn tolyq qýatynda iske qosylǵannan keiin jylyna 1 million dana ónim óndirilip, qyzmetkerler sany 800 adamǵa deiin artady", – dedi kompaniianyń operatsiialyq direktory Talǵat Ábdirahmanov.
Sondai-aq Premer-ministrdiń birinshi orynbasary QazTehna jáne Tengri Tyres kásiporyndarynda bolyp, avtobýs, arnaiy tehnika jáne avtokólik shinalaryn óndirý jumystarymen jáne óndiristik qýatty keńeitý josparlarymen tanysty.
"Memleket basshysy men Úkimettiń tapsyrmasy boiynsha biz óńirlerdi aralap júrmiz. Qaraǵandy oblysynda kóptegen mańyzdy joba júzege asyrylyp jatyr, júzdegen adam eńbek etetin iri óndiris oryndary jumys isteidi. Biz kásiporyndardyń tolyqqandy óndiris jolǵa qoiyp, ári qarai damýdy josparlap otyrǵanyn kórdik", – dedi Nurlybek Nálibaev.
Jumys saparynyń qorytyndysy boiynsha vitse-premer ónerkásip pen energetika salasyndaǵy jobalardy iske asyrý Qaraǵandy oblysyn damytýdyń mańyzdy faktorlarynyń biri bolyp qala beretinin atap ótti.
