Almatydaǵy DoubleTree by Hilton qonaqúii tóńireginde taǵy da úlken daý shyqty. Bul joly másele tek qonaqúidiń ózine emes, ony memleket menshigine ótkizý kezinde bolýy múmkin zańsyzdyqtarǵa bailanysty bolyp otyr, dep habarlaidy dalanews.kz.
Exclusive.kz basylymynyń málimetinshe, oqiǵa birneshe jyldan beri jalǵasyp keledi. Qonaqúidiń zańdy iesi sanalatyn almatylyq kásipker Sholpan Qaraneeva nysannyń ózinen zańsyz tartyp alynǵanyn aityp, quqyǵyn qaitarýǵa árekettenip júr.
Istiń mán-jaiyna súiensek, kásipker DoubleTree by Hilton Almaty qonaqúiin bank nesiesine salyp, Hilton franshizasyn satyp alǵan. Alaida pandemiia kezinde qonaqúi jumysy toqtap, qarjylyq qiyndyqtar bastalǵan. Keiin Capital Bank litsenziiasynan aiyrylyp, qaryzdardy óndirý protsesine kollektorlyq agenttik aralasqan.
Osydan keiin qonaqúidiń taǵdyry kúrt ózgergen. Basylym dereginshe, quny 9 milliard teńgeden asatyn nysan áldeqaida arzan baǵaǵa satylyp ketken. Keiin ol Qairat Satybaldyǵa qatysy bar kompaniialardyń baqylaýyna ótken.
Materialda kollektorlyq agenttik qonaqúi múlkin óte tómen baǵalap, keiin Baidala V kompaniiasyna ótkizgeni aitylady. Al bul kompaniia keiin nysandy Qairat Satybaldynyń ieligine rásimdegen. Budan soń qonaqúi memleketke “qaitarylǵan aktivterdiń” qataryna engen.
Alaida kásipker Sholpan Karaneeva men onyń advokattary bul protsestiń bári zańsyz júrgenin aityp otyr. Olar qonaqúi reiderlik jolmen tartyp alynǵan dep sanaidy. Osyǵan bailanysty qylmystyq is te qozǵalǵan. Biraq 11 ai boiy tergelgen is keiin kútpegen jerden toqtatylǵan.
Basylym taǵy bir daýly jaitqa nazar aýdarady. Málimetke sáikes, qonaqúi múlkin baǵalaǵan sarapshy birneshe kún ishinde 400 betten turatyn esep daiyndaǵan. Sonymen qatar, nysannyń tozý deńgeii naqty qujatsyz, “kózben shamalap” anyqtalǵany aitylǵan.
Materialda “Zanger” kollektorlyq agenttiginiń áreketteri de kúmán týdyratyny jazylǵan. Astana soty keiin bul agenttikten memleket paidasyna 4,2 milliard teńgeden astam qarjy óndirý týraly sheshim shyǵarǵan. Soǵan qaramastan, qonaqúidiń qalai jáne qandai jaǵdaida satylǵanyna qatysty suraqtar áli de jaýapsyz qalyp otyr.
Daýdyń taǵy bir tusy – Hilton brendine bailanysty. Kásipkerdiń advokattary halyqaralyq Hilton ataýyn paidalaný quqyǵy áli de zańdy franshiza iesinde qalǵanyn aitady. Olardyń sózinshe, qonaqúi memleketke brendpen birge berilgendei kórsetilgenimen, mundai quqyqty eshkim zańdy túrde ótkize almaǵan.
Exclusive.kz bul oqiǵany “Eski Qazaqstannyń” ádisteri áli de joiylmaǵanynyń kórinisi dep baǵalaidy. Basylymnyń jazýynsha, bizneske qysym kórsetý, múlikti kúmándi jolmen qaita bólý jáne qylmystyq isterdiń aiaqsyz qalýy qoǵamda kóptegen suraq týǵyzyp otyr.
