Túrkistan. Aýyldyq jerdegi 564 jobaǵa 2 mlrd. 970 mln. teńge bólinedi
Onyń ishinde 2017-2021 jyldarǵa arnalǵan Nátijeli jumyspen qamtý jáne jappai kásipkerlikti damytý «Eńbek» baǵdarlamasy aiasynda – 1 mlrd 936,3 mln teńgeniń 433 jobasy qarjylandyryldy. Aita ketý kerek, onyń úshten bir bóligi – «Bastaý Biznes» baǵdarlamasy qatysýshylarynan túsken jobalar, al 80 % – startap-jobalar bolyp tabylady.
Qordan nesie alǵan azamattardyń biri – Maqtaaral aýdanynyń turǵyny Murat Meiirmanov. Ol burynnan jihaz shyǵarýmen ainalysatyn, biraq memlekettiń qoldaýyn paidalanbaǵan. Ótken jyly jeke kásipker retinde tirkelip, 2018 jyldyń basynda 4 million teńge nesie alǵan. Qarajatty qural-jabdyqtar men materialdardy satyp alýǵa jumsady. Tsehte otbasy múshelerimen qatar taǵy jeti adam jumys isteidi. Materialdar Shymkentten ákelinip, daiyn taýarlar jeke dúkende satylady. Túsken tabys biznesti ári-qarai damytýǵa jáne nesieni óteýge jetkilikti bolyp tur, deidi kásip igesi.
Búgingi tańda «Aýyl sharýashylyǵyn qarjylai qoldaý qory» AQ kelesi baǵyttar boiynsha nesieleýdi júrgizedi: «Igilik» – mal men qusty ustaý jáne kóbeitý, «Birlik» — sút qabyldaý beketter júiesin qurý jáne damytý, «Kásipker» — aýylsharýashylyq jáne aýylsharýashylyq emes biznes túrlerin damytý, «Yrys» – 50-10 IQM basyna arnalǵan taýarly sút fermalaryn qurý jáne damytý, «Eginjai» – kóktemgi egis jáne kúzgi jiyn-terim jumystaryn qarjylandyrý.
Biyl mal basyn kóbeitý jáne iri qara mal etin eksporttaý kólemderin arttyrý úshin Qor jańartylǵan «Sybaǵa» baǵdarlamasyn engizdi. Bul baǵyttaǵy qarjy iri qara jáne usaq múiizdi analyq mal basyn satyp alýǵa jumsalady.
«Sybaǵa» boiynsha oblystyq filial tarapynan 565 mln teńgege 36 joba maquldanǵan, — deidi Qordyń oblystyq filialynyń direktory Ǵalymjan Nurlybaev. – Bul qarjyǵa jergilikti usaq múiizdi mal men shetelden etti baǵyttaǵy siyrlar satyp alynýda. Oblys boiynsha jyldyń sońyna deiin myńnan astam iri qara ákelinedi.
Jalpy, barlyq baǵyttar boiynsha eń joǵary kásipkerlik belsendilikti Saryaǵash aýdanynyń turǵyndary kórsetýde. Bul aýdan boiynsha 365 mln teńgege 59 joba qarjylandyryldy. Sondai-aq, kóshbasshylar qatarynda – Ordabasy, Sairam, Tólebi aýdandarynyń kásipkerleri bar.
Aýyldyq kásipkerlikti qarjylandyrý Qordyń óz qarjysy men «Eńbek» baǵdarlamasynyń ekinshi transh aiasyndaǵy qarjy arqyly jalǵasýda.
